"Səbail" - "Neftçi" qarşılaşmasında qonaqların qapı xəttində Aqil Məmmədova şans verilmişdi.

"Football-plus.az" saytı olaraq qolkiperlə “dənizçilər”lə oyun, mövsümdə az şans qazanması və karyerası barədə danışdıq.

- Bu gün 1 xal qazandız. Matçla bağlı fikirlərin maraqlıdı...
- Çətin qarşılaşma olacağını bilirdik. Buna rəğmən, oyuna yaxşı başladıq, hesabı da açdıq. Qələbə hesabını qoruya bilməməyimizin əsas səbəbi süni meydanda oynamağımızdı. Biz təbii ot örtükdə çıxış etməyə öyrəşmişik, rəqib isə əksinə. "Səbail" də yaxşı çıxış etdi. Əsas odu ki, uduzmadıq.

- Öz çıxışın haqda nə deyə bilərsən?
- Mənim, yaxud digər komanda yoldaşlarımın fərdi oyunu əsas deyil. Vacib olan "Neftçi"nin uğurlu çıxışı və nəticələridi. Hazırda hamılıqla komandamızın daha da yaxşı çıxış etməsinə köklənmişik.

- İlk "3-lük"də yerinizi rəsmləşdirmisiz, qarşıdan da kubokun cavab matçı gəlir. İlk oyunda səfərdə "Turan Tovuz"a məğlub olduz. Necə düşünürsən, doğma meydanda "boz qurd"u məğlub edib kuboka iddianızı davam etdirə biləcəksiz?
- Əlbəttə. Hamılıqla cavab oyununa ciddi hazırlaşırıq. Bu il çempionatda yaxşı çıxış edə bilmədik. Vacib xallar itirməklə çempionluq uğrunda mübarizədə şansımızı itirdik. Ona görə də məqsədimiz kuboku götürərək mövsümü titulla başa vurmaqdı. Buna inanırıq və sona qədər mübarizə aparıb qalib gələcəyik.

- Az şans qazanmağının səbəbi nədi?
- Əsas səbəb ağır zədə almağım oldu. Buna baxmayaraq, klub rəhbərliyi mənə güvənib komandada saxladı, bəzi oyunlarda da şans verildi. Ona görə də "Neftçi" rəhbərliyinə dərin minnətdarlığımı bildirirəm.

- Yayda komandanı dəyişmək fikrin var?
- "Ağ-qaralar" mənim üçün doğma, əziz komandadı. Burda karyeramın ən yaxşı anlarını yaşamışam. "Neftçi"də qalmaq və karyeramı burda bitirmək istəyirəm.

- Hazırda "Araz Naxçıvan" 1-ci divizionun aşkar lideridi və böyük ehtimalla növbəti mövsüm elitada çıxış edəcək. Bir naxçıvanlı kimi Muxtar Respublika təmsilçisində çıxış etmək istərdin?
- Az öncə dediyim kimi, bundan sonrakı karyeramı da "Neftçi"də davam etdirmək və bu komandanın üzvü kimi karyeramı başa vurmağı düşünürəm.

- Həm təcrübəli qapıçı, həm də yığmanın sabiq üzvü kimi ölkənin əsas komandasının seçmə mərhələyə uğursuz başlamasdı ilə bağlı nə deyə bilərsən?
- Bu haqda milliyə dəvət alan futbolçular danışmalıdı. Sualları onlara ünvanlasaz, yaxşıdı.

- Gənc həmkarın Yusif İmanovun çıxışını necə qiymətləndirirsən?
- Avstriya ilə oyunda şans verilib, İsveçlə qarşılaşmada ehtiyatda oturtmaq düzgün deyildi. Millidə səlahiyyət sahibi olsaydım, hər iki matçda gənc həmkarıma şans verərdim. Cavan qapıçıya güclü rəqiblə oyunda güvənib, növbəti matçda ehtiyatda saxlamaq psixoloji sarsıntıdan başqa bir şey deyil. İsveçlə görüşdə Yusifə şans verilsəydi, onun üçün daha uğurlu olacaq və qolkiperi millimizə qazandıracaqdıq. Ümumiyyətlə, gənc futbolçunu milliyə dəvət edib şans vermisənsə, sona qədər inanmalısan. Onsuz da ölkəmizdə istər qapı, istərsə də digər mövqelərdə nadir hallarda perspektivli futbolçular yetişir. Heç olmasa, yetişənləri qorumaq üçün onlara dəstək olmaq lazımdı.

- Bu mövsüm çempionatda yerli qapıçılar daha çox şans qazanır. Səncə, bu proses daha da genişləndirilməlidi?
- Sevindirici haldı ki, legioner limitinin artırılmasına rəğmən, bu mövsüm yerli qapıçılar daha çox şans qazanır və yaxşı da çıxış edirlər. Düşünürəm ki, yerlilərə nə qədər çox şans verilsə, ölkə futbolu bir o qədər inkişaf edər.

ABDULLA İSMAYILOĞLU