Gərgin keçən "Şamaxı" - "Kəpəz" oyununda qonaqların kapitanı Tural Axundov şans qazanmadı.

"Football-plus.az. saytı olaraq təcrübəli futbolçu ilə həm bununla, həm də matçla bağlı söhbətimiz baş tutdu.

- Tural, oyunla bağlı fikirlərin maraqlıdı...

- "Şamaxı" ilə çətin oyun olacağını bilirdik. Gəncədən Şamaxıya qələbə üçün gəlmişdik. Təəssüf ki, 3 xal qazana bilmədik. Amma ən azı məğlub da olmayaraq ağır səfərdən 1 xalla döndük.

- Xeyli vaxtdı şans qazanmırsan, səbəb nədi?

- Məşqçilərin qərarıdı. Bizə onların seçiminə hörmət etmək qalır. Nə vaxt şans versələr, çıxıb oynayacam.

- Zədən, məşqçilərlə problemin və ya bu kimi problemlərin yoxdu?

- Heç bir problem yoxdu

- Artıq 35 yaşın var. Oynamaq gücün və istəyin tükənməyib?

- Xeyir, hələ oynamaqdan bezməmişəm (gülür).

- Mövsümün sonunda müqavilənin müddəti bitir. "Kəpəz"lə sözləşməni yeniləyəcəksən, başqa təkliflər var?

- Hələ ki "Kəpəz"in futbolçusuyam. Hazırda qarşıdakı 5 oyuna köklənmişik. Mövsümün sonunda rəhbərliklə söhbət edəcəyik. Məsləhət olsa, razılığa gəlsək, Gəncədə qalmaq istəyərəm.

- Yığmamız AÇ-2024-ün seçmə mərhələsinə uğursuz start verdi. Həm müdafiəçi, həm də ölkənin əsas komandasının sabiq üzvü kimi müdafiə xətdindəki boşluqlar haqda nə deyərdin?

- Yığmayla bağlı çox şey demək olar. Amma uzun danışmağa lüzum yoxdu. Qısaca onu vurğulayım ki, məşqçilər futbolçuları milliyə dəvət edibsə, onların hər biri məsuliyyətini dərk etməlidi. Ölkənin əsas komandasında yer alırsansa, dövlət himni altında çıxış edirsənsə, üzərində dövlət atributları olan formanı geyinirsənsə, meydanda bütün gücünlə mübarizə aparmalı, can qoymalı, təslim olmamalısan.

ABDULLA İSMAYILOĞLU