Türkiyə futbolunun əfsanəvi isimlərindən biri olan Rüştü Rəçbərin oğlu Burakdan xəbər var.

"Football-plus.az" xəbər verir ki, ''Fənərbaxça'', ''Beşiktaş'', ''Barselona'' və Türkiyə yığmasının sabiq qapıçısı olan Rüştünün oğlu da deyəsən peşəkar futbolçu olmaq niyyətindədi. Belə ki, Burak Rəçbər İngiltərənin köklü klublarından olan KPR-in U-16 komandası ilə ikiillik müqavilə imzalayıb. Dünən baş tutan imza mərasimində yeniyetmə futbolçunun atası ilə yanaşı Anası İşıl Rəçbər də iştirak edib. Hucumameyilli oyunçu olan Burak uşaq yaşlarında həm ''Fənərbaxça'' həm də ''Qalatasaray''ın akademiyasında forma geyib. 2021-ci ildə o, İngiltərədə təhsil almaq üçün sınaq imtahanını uğurla başa vuraraq bu ölkəyə yollanmışdı. Bir müddət sonra Rüştü ilə həyat yoldaşı da oğluna dəstək vermək üçün Türkiyədən İngiltərəyə köçərək Londonda yaşamağa başlamışdı. Hazırda Burak Rəçbər həm təhsilini davam etdirir, həm də futbola vaxt tapır. O, bir müddət öncə Türkiyənin U-16 yığmasına dəvət almışdı. Həmin vaxt Burak Londonda oxuduğu təhsil müəssisəsindən bir həftəlik icazə alaraq Türkiyəyə gəlmişdi.

Onu da vurğulayaq ki Rüştünün Tuana adlı qızı isə ABŞ-da təhsil alır.