Rüştü Messinin DÇ-ni qazanması haqda nə dedi?
Türkiyə yığmasının sabiq qapıçısı və Türkiyə futbolunun tanınmış simalarından olan Rüştü Rəcbər, nəhayət, TFF-dəki işindən ayrıldığını özü rəsmən təsdiqləyib.
Football-plus.az xəbər verir ki, parlaq karyeraya malik olan, ''Fənərbaxça'' və ''Beşiktaş'' kimi İstanbul nəhəngləri ilə yanaşı, ''Barselona''da da bir mövsüm top qovan 49 yaşlı Rüştü srağagün Rıdvan Dilmən ilə birlikdə bir futbol tədbirində iştirak edərək diqqətçəkən açıqlamalar verib.
Qeyd edək ki, Rüştü həyat yoldaşı ilə birlikdə artıq 10 aydan çoxdu Londonda yaşayır. Onların oğlu Londonda universitetə qəbul olunduqdan sonra hamılıqla ora köçmək qərarına gəliblər. Bu şəhərdə şirkət quran Rüştü gələcəkdə İngiltərə vətəndaşlığını da almağı planlaşdırır. TFF-də futbol inkişaf direktoru vəzifəsini icra edən Rüştü istefaya göndərilməsi barədə söz-söhbəti təsdiqləyib və başqa mövzulara da toxunub:
''Rıdvan Dilmənin ''Fənərbaxça''da işlədiyi dönəmdə MTK ilə matçda üzücü məğlubiyyətlə üzləşmişdik. Həmin oyunda kobud səhvə yol verərək qol buraxmışdım. 0:2-lik məğlubiyyətdən sonra Rıdvan hoca istefa vermişdi. Amma sonra öyrəndim ki, onun istefası mənim səhvimlə və bizim uduzmağımızla əlaqəli deyilmiş. Bu, mənim üzüntümü bir qədər azaltmışdı. O, mənim üçün böyük qardaş kimidi. ''Fənər''ə ilk dəfə ayaq basdığımda mənə qucaq açmışdı. TFF-də tutduğum vəzifədən dünəndən (dekabrın 19-dan – red.) etibarən ayrılmış oldum. Son bir ildə orda nə etdiyimi heç özüm də bilmirdim! Konkret bir işim yox idi. Ayrılmağımla bağlı hər hansı neqativ düşüncəm yoxdu. Federasiyaya mümkün qədər xidmət etməyə çalışdım. Amma bəzən elə məqam gəlib çatır ki, artıq xidmət edə bilməyəcəyini anlayırsan. Altay Bayındır məsuliyyətdən çəkinməyən qapıçıdı. ''Fənərbaxça'' üçün çox faydalı isimdi. Gənc yaşda kapitan sarğısını taxıb və bu işin öhdəsindən gözəl gəlir. Bəzən ona qarşı etirazlar olur. Bundan sonra da olacaq. Əsas odu ki, bundan düzgün nəticə çıxarmağı bacarsın. İnşallah, ''Fənər'' bu il çempion olar. Amma bunu əminliklə söyləmək mümkün deyil. Onlar, sadəcə, favoritlərdən biridi. Son mundialda favoritim Braziliya idi. Messi sabiq komanda yoldaşımdı. ''Barselona''da oynadığım dönəmdə o, ''altyapı''dan əsas komandaya yenicə gəlmişdi. Braziliya olmasa, məhz Argentinanın çempion olmasını istəyirdim. Messi DÇ-ni qazanmaqla titul kolleksiyasını tamamladı və adını Pele, Maradona kimi dahilərlə eyni sıraya yazdırdı”.
Digər xəbərlər
