"Zirə" doğma meydanda qələbə qazanmaqla həm uğursuzluq zolağından çıxmağı, həm də 4-cü pilləyə qayıtmağı hədəfləyirdi. "Səbail" isə "Sabah" üzərində qələbənin davamını gətirməyi düşünürdü.

Oyuna da meydan sahibləri fəal başladı. Qarşılıqlı hücumlara rəğmən, ilk yarıda hesabı açmaq mümkün olmadı. Ən real imkanı "qartallar" qaçırdı. Qismətin qapı önünə asmasına yüksələn Kulaça dirək mane oldu. İkinci hissədə təzyiqi atıran “Zirə” tezliklə istəyinə çatdı. 52-ci dəqiqədə Rəhim – Eldar - Kulaç “üçlüy”ünün təşkil etdiyi hücumu sonuncu dəqiq zərbəylə tamamladı. 69-cu dəqiqədə isə Cənnətov uzun ötürməylə Keytanı gördü ki, futbolçu fərdi reydini Rüstəmə assistlik etməklə tamamladı. Qoldan doymayan qəsəbə təmsilçisi hücumları davam etdirsə də, frqlənmək mümkün olmurdu. Eyni sözləri qol axtarışında olan qonaqlara da aid etmək olar. Nəhayət, 90-cı dəqiqədə Rüstəmin ötürməsindən sonra Eldar hesabı 3:0-a çatdırdı. Bir qədər sonra isə Cənnətovun dəf etdiyi topu Zakpa təkrar zərbə ilə tora qovuşdurdu.

Gözdən qaçmadı
* "Səbail"in qadınlardan ibarət azarkeş qrupu 90 dəqiqə fəallığı ilə seçildi.
* 26-cı dəqiqədə Rəşad Sadıqov 4-cü hakimə “yekə oğlansız, ayıbdı, bizə elə epizoda görə 5 dəfə “qırmızı” vermisən” dedi. Mütəxəssis 2-ci hissənin gedişində isə Coşqun Diniyevi hədəfə aldı: “ağıllı ol, ağıllı oyna”.