“Heç kimin gözləmədiyi halda maraqlı “dördlük” alındı. Halbuki “Qarabağ” la “Sabah” kuboka əsas namizəd kimi görünürdü. İlk “üçlük”dən “Neftçi” tək qaldı. “Turan Tovuz” - “Kəpəz” oyununda sensasiya olmadı. “Qarabağ”la “Sabah”ın mərhələni keçə bilməməsi isə gözlənilməz nəticədi. “Neftçi” də bu siyahıda ola bilərdi. “Zirə”nin böyük şansı olsa da, bundan istifadə edə bilmədi. Əlavə olunmuş dəqiqələrdə də komanda yaxşı oynadı, “Neftçi”ni sıxışdırdı. Lakin bəxtləri gətirmədi ki, yarımfinala adlasınlar. Ümumilikdə “dördlük” maraqlıdı. Biri çempionatın sonuncu pilləsində yer alır, digəri isə ilk “beşlik”də olmayan komandadı. Belə baxanda, finala daha yaxın “Qəbələ” və “Neftçi” görünür. Ancaq bu yanlış da ola bilər. Yaxın günlərdə başa çatan dünya çempionatı da göstərdi ki, proqnozlar özünü doğrultmur. Çox uzağa getməyək, “Qarabağ” və “Sabah”la bağlı təxminlərdə də yanıldıq. Ancaq ilk görünən budu ki, finalda “Neftçi”ylə “Qəbələ” üz-üzə gələcək. Motivasiya ilə digər komandalar da çox şeyə nail ola bilər. Uzun marafon da deyil, 2 oyun olacaq. Futbolçuların bu qarşılaşmalara yanaşması, motivasiyası vacib rol oynayacaq. Ona görə “Səbail”lə “Turan Tovuz”un da şansı var. “Səbail” “Sabah” kimi kollektivi kənarda qoydu. “Turan Tovuz” da oynamağı bacaran komandadı. Lakin “Neftçi” və “Qəbələ” həm təcrübə, həm də potensial baxımından finala yaxın görünür. Heyətlərində də yüksək səviyyəli futbolçular çoxdu”.