MHL-də son 4 gündə keçirilən oyunlarda həm fərdi, həm də komanda rekordları qeydə alındı.

"Football-plus.az" xəbər verir ki, “Pittsburq”un hücumçusu Sidni Krosbi “Detroyt” üzərindəki qələbəyə 2 qol və 1 məhsuldar ötürmə ilə töhfə verdi. Karyerası boyunca topladığı xal sayını 1500-ə (550+950) çatdıran 35 yaşlı kanadalı ulduz MHL tarixinə bu göstəriciyə nail olan 15-ci, yalnız bir komandada çıxış etməklə bunu bacaran 7-ci hokkeyçi kimi düşdü.

Makdevidin də rekordu möhtəşəmdi. “Edmonton”un forvardı “San-Xose” ilə oyundakı iki qol və bir məhsuldar ötürmə sayəsində cari mövsümdə xal sayını 151-ə (64+87) çatdırdı. O, MHL tarixinə mövsüm ərzində 150 və daha artıq xal toplayan 7-ci oyunçu kimi düşdü. Sonuncu dəfə belə nəticəni 1995/96 mövsümündə Mario Lemye (161 – 69+92) göstərmişdi.

Komanda uğurundan danışırıqsa, təbii ki, ilk növbədə “Boston”un adını çəkməliyik. “Bryuinz” dünən “Filadelfiya”nı məğlub etməklə cari mövsümdəki qələbə sayını 63-ə çatdırdı. Hələ iki oyunu da qalan komanda qələbə sayında müntəzəm çempionatların yeni rekordunu müəyyənləşdirdi.

İndiyə qədər ən yaxşı nəticə 62 qələbə idi – “Detroyt” 1995/96, “Tampa-Bey” isə 2018/19 mövsümündə bunu bacarmışdı. Cari mövsümdə keçirdiyi 80 oyunda 131 xal toplayan “Boston”un Şərq konfransının qalibi olmaqla yanaşı, Prezident kubokunu qazandığını da xatırladaq.