MHL-də son üç gündə keçirilən oyunlarla bağlı maraqlı statistik məqamlar var.

Football-plus.az xəbər verir ki, uğursız çıxışını davam etdirən “Vaşinqton” srağagün səfərdə “Kalqari”yə uduzdu. Paytaxt klubunun hücumçusu Aleksandr Oveçkin MHL karyerasındakı 1300-cü oyunda heç bir məhsuldar hərəkətlə yadda qalmadı. Oyun sayına görə 66-cı yerdə qərarlaşan rusiyalı hücumçu bu göstəricidə lider olan Patrik Marlodan (1779) çox geri qalır.

Patrik Keyn isə MHL tarixinə “Çikaqo”nun heyətində 1200 xal toplayan 2-ci hokkeyçi kimi düşdü. O, komandasının “Reyncers” üzərindəki qələbəsinə 3 (1+2) xalla töhfə verdi. Karyerası boyunca 1130 oyun keçirən Keyn 434 qol vurub, 766 məhsuldar ötürmə verib. “Çikaqo” tarixində ondan çox xal toplayan yeganə oyunçu Sten Mikitadı. Adı çəkilən hokkeyçu 1396 oyunda 1467 (541+926) xal toplamağı bacarıb. Keyn həmçinin fəaliyyətdə olan oyunçular arasında 1200 xal həddinə çatan 3-cü hokkeyçidi. Qalan iki hokkeyçi Sidni Krosbi (“Pittsburq”, 1133 oyunda 1442 xal) və Aleksandr Oveçkindi (1300 oyunda 1435 xal).

Komanda uğurlarından danışanda isə ilk növbədə “Boston”un adını çəkmək lazımdı. “Bryuins” srağagün Stenli kubokunun son qalibi “Kolorado”nu məğlub etməklə mövsümün əvvəlindən bəri evdə qazandığı qələbələrin sayını 14-ə çatdırdı. Bundan başqa, “ayılar” mövsümün ilk 23 oyununda 23-cü qələbəsini qazanmaqla MHL rekordunu da təkrarladı. İndiyə qədər “Boston” özü (1929/30 mövsümündə) və “Çikaqo” (2012/13) belə əla start götürüb. 23 oyunda 40 xal toplayan “Boston” hazırda ümumi turnir cədvəlində “Nyu-Cersi”dən geri qalsa da, bu komandadan iki oyun az keçirdiyini, yəni itirilməyən xallara görə lider olduğunu da xatırladaq.