Tovuzdakı oyun qarşılıqlı qollarla başladı. Əvvəlcə Runi kornerdən qapı önünə asmanı başla dəqiq tamamladı. Yerli azarkeşlər qol sevincini doyunca yaşayıb qurtarmamışdı ki, bu dəfə sevinmək növbəsi qonaqlara çatdı.

Fuad özünəxas tərzdə cinahdan asmayabənzər zərbə ilə “status-kvo”nu bərpa etdi. Bayramov, demək olar, eyni qolu 16-cı turda səfərdə “Sabah”ın qapısına da vurmuşdu. Ümumiyyətlə, matçda ən maraqlı məqamlar ilk yarıda yaşandı. Hər iki komandanın fərqlənmək üçün imkanı olsa da, tablodakı rəqəmlər dəyişmədi. İkinci hissənin əvvəli də maraqlı alındı.

Qonaqların heyətində Rəşad Əzizli inamlı oyunla komandasının xal qazanmasında pay sahibi oldusa, meydan sahiblərindən Eva şansları boşa verməkdə idi. 70-ci dəqiqədən etibarən isə sanki həm meydan sahiblərinə, həm də qonaqlara “dur” komandası verildi. Tribunalara toplaşanlar daha çox meydanın mərkəzində gedən mübarizəyə şahidlik etdi.

Gözdən qaçmadı

* “Sektor 56” fanklubunun üzvləri az sayda olsa da, Tovuza təşrif buyuraraq “Şamaxı”nı tək buraxmamışdı.

* 80-ci dəqiqədən etibarən bir qrup tovuzlu azarkeş “istefa” şüarları səsləndirməyə başladı. Aralarında uşaqlar çoxluq təşkil edirdi. Hakimin final fitindən sonra azarkeşlərdən biri paltardəyişmə otağına yollanan Ayxan Abbasovu söydü ki, bu da baş məşqçini özündən çıxardı. Klubun icraçı direktoru Nadir Nəbiyev onu çətinliklə sakitləşdirə bildi.

* Fasilədə isinmə hərəkətləri edən Xəyal Nəcəvov bir qrup azyaşlının istəyini nəzərə alaraq, məşqi yarımçıq saxlayıb onlarla selfi çəkdirməyi özünə borc bildi.

* 44-cü dəqiqədə bütün tribunalar ayaqüstə “Şəhidlər ölməz, vətən bölünməz” şüarını səsləndirərkən, “Şamaxı”nın idman direktoru Kamran İsmayılov yerindən durmadı. Bunu görən azarkeşlərdən biri “buna bax, şor yeməkdən boyu da çıxmır” söyləyib, əsəbləşdi.

Maraqlıdı...

“Turan Tovuz”un futbolçusu Runi Eva Misli premyer-liqasında son 8 mövsümün rekorduna imza atıb. O, 2015-ci ildən sonra bir çempionatda ən çox qol vuran afrikalı legioner olub. Kamerunlu hücumçu cari mövsümdə 12-ci dəfə fərqlənib. O “Şamaxı” ilə son ev qarşılaşmasında rəqib qapısına yol tapıb. Afrika təmsilçisinin daha çox qol vurması son dəfə 2014/15 mövsümündə yaşanıb. Həmin vaxt AZAL-da çıxış edən konqolu Freddi Mombonqo 13 dəfə rəqib qapısına yol tapıb. Sonrakı 8 ilin rekordu isə İbrahima Vaciyə məxsus idi.

“Qarabağ”ın seneqallısı ötən çempionatda 11 dəfə fərqlənib.