İlk hissə yetərincə gərgin keçdi.

Football-plus.az xəbər verir ki, “ağ-qaralar” müəyyən üstünlüyə malik olsa da, sumqayıtlılar da boş dayanmırdı. Heyətində ciddi itkilər olan “kimyaçılar” rəqibi əks-hücumda tutmağa çalışırdı ki, zaman-zaman bu onlarda alınırdı. Ancaq bitiricilik baxımından Abasovun komandasında heç nə alınmırdı. Qonaqların heyətində xüsusilə Tisdeli qeyd etmək lazımdı. Liberiyalı vinger həm sürətli, həm də yüksək texnikaya malik olduğundan sağ cinahdan hücumlar zamanı rəqibin müdafiə xəttini asanlıqla yarır, bəzən “Neftçi”nin iki oyunçusunu çətinlik çəkmədən keçirdi. Birinci 45 dəqiqədə qonaqların müdafiəçilərinin intizamlı oyununu da vurğulamaq lazımdı. Meydan sahibləri müəyyən ərazi üstünlüyünə sahib olsa da, real qoş vəziyyəti yaratmaqda çətinlik çəkirdilər. İlk hissəsi qolsuz bitən görüşdə hər iki qol fasilədən sonra vuruldu.

54-cü dəqiqədə Lebonun künc zərbəsindən qapı önünə asmasını Solomon dəqiq baş zərbəsi ilə tamamladı. Gürcü müdafiəçi “ikinci mərtəbə”də Muradla mübarizədən qalib ayrılaraq adını tabloya yazdırdı. Yeri gəlmişkən, bir tur əvvəl, “Neftçi”nin “Zirə”ni minimal hesabla məğlub etdiyi oyunda da “ağ-qaralar”ın yeganə qolunu Stankoviç oxşar vəziyyətdən vurmuşdu. 10 dəqiqə sonra meydan sahiblərinin qışda “rənglərinə bağladığı” Mateus tribunalara toplaşan azsaylı “Neftçi” azarkeşlərini sevindirdi. Sayefdən ötürmə alan braziliyalı sona qədər oynayaraq Bədəlovla mübarizədən qalib ayrılıb topu tora qovuşdurdu. İkinci qolda Eminin kobud səhvə yol verdiyini qeyd etmək lazımdı. Müdafiəçi təhlükəni uzaqlaşdırmaq və ya qapıçıya ötürmək əvəzinə topu başla qarşısına atıb nə etmək istədiyini özü də bilmədi. Mateus isə imkandan maksimum yararlanaraq yeni komandasında qol hesabını açdı. Yeri gəlmişkən, oyunsonrası mətbuat konfransında “kimyaçılar”ın baş məşqçisi bu epizoda görə hakimdən narazı qaldığını söylədi. Samir bəyin fikrincə, komandası belə vəziyyətdən fərqlənsəydi, hakimlər dərhal VAR-a müraciət edərdi. Bəlkə də onun sözlərində həqiqət payı var. Ancaq necə deyərlər, daldan atılan daş topuğa dəyər. Qalan dəqiqələrdə “Sumqayıt” böyük qüvvə ilə irəli atılsa da, tabloda hesab dəyişmədi.

Qarşılaşma haqda qısaca onu demək olar ki, “Neftçi” o qədər də parlaq olmayan oyunla istədiyinə çatdı. “Sumqayıt” isə bunu bacarmadı.

Gözdən qaçmadı

* 35-ci dəqiqədə polislər “Neftçimaniya” fanklubunun üzvlərini söyüş söydüklərinə görə tribunadan uzaqlaşdırdı.

* Vaxtilə “Neftçi”də Samir Abasovla işləyən, daha doğrusu, onun məşqçilər korpusunda qapıçı məşqçisi olan Etibar Tarverdiyev də “Bakcell Arena”da idi. Hazırda U-16-da eyni vəzifəni ica edən mütəxəssisin oyundan əvvəl sabiq iş yoldaşları ilə isti görüşməsi diqqətimizdən yayınmadı.

* “Kimyaçılar” fanklubu “Bakcell Arena”da da sevimli komandalarını tək buraxmamışdı. Nə qədər təəccüb doğursa da, onların sayı meydan sahiblərinin fanklubu “Forza Neftçi”nin oyunu canlı izləyən üzvlərindən daha çox idi.

RƏŞAD