"Şamaxı" son matçlarda ilk "5-lik" komandalarına qarşı gözəl, mübariz oyun göstərməklə və onlardan xal qoparmaqla diqqəti çəkir.

Doğma meydanda "Sabah"ı yenəndən sonra iştah daha da artıb. Ötən turda da səfərdə "Zirə"dən xal qoparması bölgə təmsilçisində ab-havanı yüksəltmişdi. Son turda "Turan Tovuz"u darmadağın edən "Neftçi" də Şamaxıya qələbə üçün gəlmişdi.

Hakimin start fitindən sonra meydanda yaradıcı, sürətli futbol gördük. İlk təhlükəli zərbə "Şamaxı"dan gəldi. Topu Raufdan qəbul edən Bahadur cərimə meydançasına daxil olub, qapıçını da keçdikdən sonra iti bucaq altından zərbə vurdu. Lakin Kverkveliya topu boş qapıdan çıxarmağı bacardı. Qonaqların cavabı da özünü çox gözlətmədi. Kverkveliya – Mahmudov - Saldanya “üçlüy”ünün təşkil etdiyi hücumda sonuncunun zərbəsi tirdən qayıtdı. Rəqibdən çəkinməyən "şirlər"in növbəti hücumu zamanı Nihad reydini Amili qapıçıyla duelə çıxarmaqla tamamladı. Lakin Brkiç qola mane oldu. "Şamaxı" bu dəqiqələrdə meydanın ağası olduğunu göstərirdi. İş o yerə çatmışdı ki, Saldanya belə müdafiəyə çəkilmişdi. Bəlkə də cari mövsümün ən rəngarəng oyununu izləyirdik. Bir qədər sonra Lebon qeyri-dəqiq zərbə vurdu. 15-ci dəqiqədə isə Elvindən ötürmə alan Əlinin fərqlənməsinə Brkiç imkan vermədi. Xorvat qapışı Rəhmanın iti bucaq altından zərbəsinə də əla reaksiya verdi. İlk hissəyə əlavə olunan dəqiqələrdə isə Əli Səmədov meydanın "Neftçi"yə aid hissəsində Azər Əliyevə pressinq tətbiq edərək topu Amilə qazandırdı. Yunanov müdafiəçiləri və Brkiçi də keçib qapını nişan aldı. Kverkveliya bu dəfə də özünü çatdıraraq topu boş qapıdan çıxardı.

Komandalar ikinci yarıya ehtiyatlı başladı. Mübarizə daha çox topa sahib olmaq uğrunda gedirdi. İlk həmlə isə yenə meydan sahiblərindən gəldi. Amil cinahdan cərimə meydançasına şığıyaraq qapını nişan alsa da, Brkiçlə dueldən məğlub ayrıldı. Fuadın cərimə zərbəsindən fərqlənmək istəyi də alınmadı. Bundan sonra "Neftçi" qismən topa nəzarət etsə də, rəqib qapısına yaxınlaşa bilmirdi. "Şamaxı" meydanın hər qarışında inadla müqavimət göstərirdi. Matçın gözlənilməz anı isə 81-ci dəqiqədə baş verdi. Arveladze ara ötürməsiylə Sayefi zərbə mövqeyinə çıxarmağa çalışarkən Rəşad Əzizli irəli şığıdı. Ancaq topu əlindən buraxan qapıçı Saldanyanın boş qapını nişan almasına şərait yaratdı. Qoldan sonra "Neftçi" daha ehtiyatlı oyuna keçdi. Meydan sahibləri isə tam təbii olaraq irəli atıldı. Qurbanın fərqlənməsinə qapıçı, Raufa isə qeyri-dəqiqlik mane oldu. Uzatma dəqiqələrdə müdafiəçilərin səhvindən sonra topu ələ keçirən Boqomolski fərqi artırmaq şansını qaçırdı. Onun zəif zərbəsini Əzizli asanlıqla zərərsizləşdirdi. Hakimin final fiti bakılıların səfərdən 3 xalla ayrılmasını rəsmləşdirdisə, "şirlər"in əziyyətini bir kobud səhv heçə endirdi.

Gözdən qaçmadı

* Milli komandamızın baş məşqçisi Canni de Byazi və PFL prezidenti Elxan Səmədov Şamaxının icra başçısı Tahir Məmmədovla birgə oyunu fəxri tribunadan izləyirdi. Futbolun İnkişaf Fondunun rəhbəri Tural Piriyev də stadionda idi. "Neftçi" rəhbərliyindən isə kubun Müşahidə Şurasının üzvü Zaur Qəhrəmanov gözümüzə dəydi.
* "Şamaxı"nın fəal azarkeşlərindən olan Fuad Bayramovun atası Etibar Bayramov "40 illik "Neftçi", məni bağışla. Artıq "Şamaxı" fanatıyam" plakatı qaldırmışdı.
* Oyun bitəndən sonra "Neftçi" azarkeşləri "Saldanya, Saldanya" deyərək, yeganə qolun müəllifini alqışladı.

ABDULLA İSMAYILOĞLU