Konfrans Liqasına vəsiqə baxımından böyük əhəmiyyət daşıyan oyunda komandaların hər biri qələbə qazanmaq istəyirdi. Oyun sürətli başladı.

Komandalar hücuma atılsa da, müdafiəçilər olduqca etibarlı oynayırdı. Tədricən sürət də aşağı düşdü. Hamdauinin zədələnməsi bakılıların sürətli hücumlarının kəsərini azaltdı. Buna baxmayaraq, qonaqlar fasiləyə qədər iki-üç təhlükəli hücum qurdu. Sadəcə, sonda ya dəqiqlik çatmırdı, ya da Səlahət Ağayev etibarlı oynayırdı.

İkinci hissəyə “Qəbələ” sürətli başladı. “Zirə” daha çox əks-hücumlara bel bağlayırdı. “Qəbələ” isə cinahlardan bakılıların müdafiəsini yarmağa cəhd edirdi. 58-ci dəqiqədə “qırmızı-qaralar” istəyinə çatdı. Məqsədin asmasını Maçado başla qapıya göndərdi. Qolda Nəzirovun kobud səhvi var idi. Qolkiper topu əlindən buraxdı. Bundan sonra “Zirə” toparlandı. Rəşad Sadıqovun komandasında Eldar, Rəhim, Rüstəm və Keyta xüsusi fəallıq göstərirdi. 69-cu dəqiqədə Eldar Keytanın ötürməsindən sonra hesabı bərabərləşdirdi. Təbii ki, “Zirə” Bakıya 1 xalla dönməyə razı idi. Lakin Elmar Baxşıyevin komandası bununla razılaşmadı. 80-cı dəqiqədə Ruan “Zirə”ni oyunun yekun hesabını müəyyənləşdirdi. Beləliklə, həftənin açılış matçında “Qəbələ” “Zirə”ni məğlub etməklə 4-cü pilləyə yüksəldi. Bölgə təmsilçisinin kubokda da qaldığını nəzərə alsaq, Rəşad Sadıqovun komandası Konfrans Liqasına vəsiqə qazanmaq üçün ciddi çətinlik çəkəcək.

Gözdən qaçmadı
* Rüstəm Əhmədzadə meydandan çıxarkən ehtiyat oyunçular skamyasını yumruqladı. Həkimlər onun ayağına müdaxilə etmək istəyəndə Rüstəm əlindəki bandajı yerə tulladı.
* Qismət Alıyev epizodların birində İsnik Alimiyə qarşı kobud oynadı. Bu da yerli azarkeşlərin qəzəbinə səbəb oldu. Top nə vaxt Qismətdə olurdusa, fanatlar onu fitə basırdı. Matç bitən kimi isə Alıyev azarkeşlərin üzərinə yürüdü. “Zirə”nin kapitanı “uzun illər burda can qoymuşam, ona hörmət edin”, - deyə üsyan etdi.