Komandalar qonşu pillələrdə yer aldığından oyuna maraq böyük idi.

Football-plus.az xəbər verir ki, “Zirə” qələbə qazansaydı, demək olar ki, bir çox məsələləri həll edəcəkdi. Lakin görüşə qonaqlar sürətli başladı. 3-cü dəqiqədə Rövlanın zərbəsindən sonra Mehdi top geri qaytarsa da, özünü yetirən Utziq hesabı açdı. Qoldan sonra “Zirə” hücumların kəsərini artırdı. “Qəbələ” sərtliklə bunun qarşısını almağa çalışırdı. Daha çox Rövlan Keytanın sol cinahdan keçidlərinə mane olurdu. Lakin 15-ci dəqiqədə “qartallar” hesabı bərabərləşdirdi. Broqnonun cərimə zərbəsindən ötürməsini Çantakias başla qapıdan keçirdi. 8 dəqiqə sonra hesab dəyişə bilərdi. Amma Kamal Umudlunun təyin etdiyi penaltini Rəhim dəqiq yerinə yetirə bilmədi. Fasiləyə kimi tərəflər çox çalışsa da, başqa qol vurulmadı.

İkinci hissəyə bakılılar sürətli başladı. Kubokdan əlini üzən “Zirə” çempionatda 4-cü pilləni “özəlləşdirmək” istəyini aşkar göstərirdi. Daha çox Keyta və Broqno fəallıq göstərirdi. Bu ikili 57-ci dəqiqədə qolun vurulmasında iştirak etdi. Fransalı sol cinahda reyd edərək qapıya zərbə vurdu. Dirəkdən dönən topa isə belçikalı özünü yetirdi. Amma zirəlilərin üstünlüyü 21 dəqiqə çəkdi. Elmar Baxşıyev “joker”i Ülvini meydana buraxmışdı. Özünü yaxşı tərəfdən göstərən forvard 78-ci dəqiqədə ideal ötürmə ilə Santosu zərbə mövqeyinə çıxardı. Braziliyalı isə Mehdini məyus edərək yekun nəticəni müəyyənləşdirdi. Avrokuboklara iddialıların duelində 4 qol vurulsa da, qalib bəlli olmadı.

Gözdən qaçmadı
* 10-cu dəqiqədə Hacıağa Hacılı sarı vərəqə aldı. Buna hirslənən Rəşad Sadıqov əli ilə boğazını göstərərək belə dedi: “Nə edirsən, yavaş oyna! Hacı, boğazdasan”.

* 28-ci dəqiqədə “Zirə”nin futbolçusu zədələndi. Kamal Umudlu həkimləri meydana çağırdı. Onlar gəlməmiş futbolçu ayağa qalxdı. Rəşad Sadıqov həkimə əsəbləşərək “bəsdi tez-tez girdin meydana” dedi. 4-cü hakim də bu səbəbdən həkimə xəbərdarlıq edəndə baş məşqçinin cavabı belə oldu: “Sən öl. Kamalın özü çağırdı”.

* Çantakias fərqlənəndən sonra ehtiyat oyunçular skamyasında əyləşənlərdən birinə öpüş göndərdi.
* Matçın 33-cü dəqiqəsində Kamal Umudlu Akalla Çantakiası sarı vərəqə ilə cəzalandırdı. Penalti gözləyən Rəşad Sadıqov əvvəlcə 4-cü hakim Kamranbəy Rəhimova söz atdı: “Zərbə vurulanda top meydanda idi. Bunu nəzərə alın”. Vərəqələrdən sonra isə daha da coşdu: “Yetim nə etdi ki? Niyə Çantakiasa “sarı” verdin? Ona niyə? Deyim niyə? Çünki 4-cü “sarı”sı idi. Buna görə, hə?”

İLKİN SULTANLI