Yağışlı havada derbi izləməyin öz ləzzəti var. Hələ bu qarşılaşma çox gərgin keçirsə, daha da zövq alırsan. “Zirə” – “Neftçi” matçı haqda bu fikirləri səsləndirə bilərik? Əlbəttə! Stadionun projektorunda hansısa problem olmasaydı, azarkeşlər arenanı doldursaydı, əminliklə deyə bilərdik ki, Türkiyə superliqasının və ya Rusiya premyer-liqasının yüksək pillələri uğrunda mübarizə aparan komandaların oyununu izləyirik.

Matç çox sürətli başladı. İlk dəqiqələrdən hakim Nicat İsmayıllının bu gərgin görüşün öhdəsindən gələ bilməyəcəyini düşünmək olardı. Lakin gənc referi də illərin təcrübəlilərindən heç də geri qalmayan idarəçiliklə diqqəti çəkdi. Qarşılaşma isə, demək olar ki, “Neftçi”nin qolu ilə başladı. 12-ci dəqiqədə künc zərbəsinin ardından Lebon “Zirə”nin qapısına “raket” göndərərək hesabı açdı. İlk hissənin sonlarına kimi “qartallar”ın hücum xəttində yer alan Rəhim, Keyta, Rüstəm və Hamdaui qol vurmağa yaxın olsa da, hamısında Brkiç etibarlı oynadı.

İkinci hissəyə meydan sahibləri üstün başladı. Demək olar ki, “qartallar” flaqmanı qapısına sıxışdırmışdı. Rəşad Sadıqovun komandası məğlub olmaq istəmirdi. “Zirə” qol istəyinə 70-ci dəqiqədə çatdı. Hamdauinin cərimə zərbəsindən qapı önünə göndərdiyi top Sayefə dəyərək tora daxil oldu. Qoldan sonra Rəşad Sadıqov dəyişikliklər edərək qələbə topunu vurmaq niyyətini göstərdi. Lakin işlər tərsinə getdi. Daha çox hücuma atılan tərəf “Neftçi” idi. 77-ci dəqiqədə flaqman penalti vurmaq imkanı əldə edə bilərdi. Amma Azərin ötürməsindən sonra top Hacıağanın əlinə dəysə də, Nicat İsmayıllı görüşü davam etdirdi. Qarşılaşmanın sonlarına doğru tərəflərin cəhdlərinə baxmayaraq, başqa qol vurulmadı – 1:1 .

Gцzdən qaçmadı
* Zirə İdman Kompleksinin stadionunun projektorlarınından biri işləmirdi. Yağış onlardan birinin sıradan çıxmasına səbəb oldu.
* “Forza Neftçi” azarkeє qrupu stadiona gec gəldi.
* Nə qədər qəribə olsa da, millinin çalışdırıcılarından heç biri oyunu izləmirdi.
* Matçın sonlarında “Neftçi”nin azarkeşlərindən birinin fikri hamının diqqətinə səbəb oldu: “Rəşad, gəl “Neftçi”yə! Halaldı sənə! Nə edirsən-et, gəl “Neftçi”yə! Bunlar səni gətirən deyillər”.