Hesabat turunda “Zirə”nin xal itirməsi “Qəbələ”nin işinə yaraya bilərdi.

Elmar Baxşıyevin çalışdırdığı “qırmızı-qaralar” 90 dəqiqəni qələbə ilə vuracağı halda “qartallar”la xal fərqini minimuma endirəcəkdi. Turnir cədvəlinin alt sıralarında qərarlaşan və elitanı tərk etmək təhlükəsi ilə üzləşən “Şamaxı” isə Qəbələdən xalla dönəcəyi halda təhlükəli zonadan uzaqlaşacaqdı.

Oyun qarşılıqlı hücumlarla başladı. Həm “qırmızı-qaralar”, həm də “şirlər” “ən yaxşı müdafiə hücumdu” prinsipinə riayət edərək, ilk dəqiqələrdən xoşbəxtliyi rəqib qapısı önündə axtarırdılar. Komandalar hücuma aludə olduğundan müdafiədə böşluqlar yaranırdı ki, kimin bundan yararlana biləcəyini zaman göstərəcəkdi. Daha təcrübəli futbolçların çıxış etdiyi “Qəbələ” ilk yarıda Əyyub Allaşın dublu ilə fasiləyə iki top irəlidə yollanmağı bacardı. Onu da qeyd edək ki, hər iki qolda məhsuldar ötürmənin müəllifi Santos oldu. 19-cu dəqiqədə braziliyalının qapıçı meydançasına zərgər dəqiqliyi ilə ötürməsini belçikalı tək toxunuşla dəqiq tamamladı. Hissənin son saniyələrində vurulan qolda isə hər iki legionerin ustalığını vurğulamaq lazımdı.

Fasilədən sonra da ssenari dəyişmədi. Hesabda geri düşməsinə baxmayaraq, “şirlər” ruhdan düşməyərək sürətli hücumlar sayəsində meydan sahiblərini cəzalandırmağın yollarını axtarırdı. “Qəbələ” isə müdafiədə etibarlı oynamaqla yanaşı, qonaqları əks-hücumda yaxalamağa çalışırdı. “Münəccimlər” çox çalışsa da, kəmiyyəti keyfiyyətə çevirə bilmirdi. Baxşıyevin komandası isə əksinə, “az olsun, saz olsun” deyiminə əməl etməklə daha təhlükəli, yaddaqalan hücumlar qururdu. İkinci 45 dəqiqədə qapılara qol vurulmadığından tablodakı hesab dəyişmədi. Və beləcə, “qırmızı-qaralar” bayram günlərində azarkeşlərinə qələbə hədiyyə etməklə yanaşı, 3-cü dövrəninin son oyununda hesabına 3 xal yazdı.

Gözdən qaçmadı
* Günün ilk yarısında Qəbələdə günəşli hava olsa da, günortadan sonra qara buludlar şəhərin üstünü aldı. Hakimin start fiti ərəfəsində güclü yağış yağmağa başladı ki, bu da stadiona gələn azarkeşlərin sayına təsirsiz ötüşmədi. Nə qədər təəccüblü görünsə də, cümə günü Qəbələ stadionunda polislərin sayı bəlkə də azarkeşlərin sayından çox idi.
* Oyunun hakim-inspektoru Vüsal Əliyev olsa da, Əmrah İbrahimovla İmanxan Sultanini də Qəbələ stadionunda gördük.
* Mövsümdə ilk dəfə “Qəbələ” öz meydanında keçirdiyi oyuna ağ formada çıxmışdı. Səbəb “Şamaxı”nın qırmızı-göy formadan başqa ikinci geyim dəstinin olmaması idi.

RƏŞAD