Bu həftə Avropanın bir çox ölkəsində olduğu kimi Niderland çempionatında da yeni mövsüm start götürdü.

Bu yay Burak Yılmazı transfer etməklə diqqət çəkən ''Fortuna'' ilk turda doğma meydanda son çempion ''Ayaks''la qarşılaşdı. Sittard təmsilçisi 6-cı dəqiqədə hesabı açsa da, 62-ci dəqiqədə qonaqlar artıq 3:1 hesabı ilə öndə idilər. Fiziki cəhətdən tam hazır olmadığı üçün start heyətində yer almayan Burak 66-cı dəqiqədə meydana çıxaraq həm yeni klubunda, həm də yeni çempionatda debüt etdi. Təcrübəli forvard 87-ci dəqiqədə təxminən 30 metrlik məsafədən cərimə zərbəsini mükəmməl yerinə yetirərək fərqi minimuma endirdi. Amma meydan sahiblərinin bundan artığına gücü çatmadı. İlk oyundaca qol hesabını açan Burak adını ''Fortuna''nın tarixinə yazdırdı. 37 yaş 22 günlüyündə fərqlənən Yılmaz klubun tarixində erediviziyada qol vuran ən yaşlı futbolçuya çevrildi.