''Fənərbaxça''ya böyük ümidlərlə transfer olunmasına baxmayaraq bu mövsümün gedişində gözlənilmədən əsas komandadan kənarlaşdırılan və başqan Əli Koçla münasibətlərinin qaydasında olmadığı deyilən Məsut Özil dünən Rıdvan Dilmənlə görüşüb.

"Football-plus.az" xəbər verir ki, Dilmənin həm ''Fənər''in əfsanəsi, həm də Türkiyənin ən tanınmış şərhçilərindən olmasına görə onların bu görüşü böyük marağa səbəb olub. Bu ikili Bebekdəki Boğaz mənzərəli bir restoranda görüşərək qəhvə içib və uzun müddət söhbət edib. Təxminən 2 saat hərarətli şəkildə söhbət edərək müzakirələr aparan Özil ilə Dilmən daha sonra məkandan birlikdə ayrılıb. Məsut jurnalistlərin həm öz durumu, həm də komanda ilə bağlı çoxsaylı sualların hamısını cavabsız qoyub. Məhşur futbolçu daha sonra onu həyat yoldaşının ikinci hamiləliyi münasibətilə təbrik edən jurnalistlərə minnətdarlığını bildirərək maşınına minib. Rıdvan Dilmən bir müddət öncə Məsutun ABŞ-dan rəsmi təklif aldığını, amma ''Fənərbaxça''da qalmaq istədiyini etiraf etmişdi. Türkiyə mətbuatının yazdığına inansaq, ''Fənər''lə hələ 2024-ə qədər müqaviləsi olan Özil yeni baş məşqçi Jorje Jezuşun təyinatını gözləyir.

''Sarı-lacivərdlilər''lə ilkin anlaşma əldə etdiyi deyilən portuqaliyalı mütəxəssisin gələn həftəsonu ailəsi ilə birlikdə İstanbula gələrək özünə ev seçəcəyi gözlənilir. Qeyd edək ki, Məsut indiki baş məşqçi İsmayıl Kartalla münaqişə yaşadığı üçün 3 aya yaxındı fərdi şəkildə məşq etmək məcburiyyətində qalıb.