Yığmaların yoldaşlıq görüşləri üzündən yaranacaq fasilə ərəfəsində keçirilən 14-cü turda maraqlı hadisələr baş verdi.

5 qarşılaşmanın üçündən meydan sahibləri qalib ayrıldı, ikisi heç-heçə bitdi. Qolsuz bitən görüşlərdən biri “Bank Respubika Arena”da keçirildi. 13 turdan sonra yüzfaizlik nəticə ilə turnir cədvəlinə başçılıq edən “Qarabağ” Masazırda “Sabah”ın qonağı oldu. 10 min azarkeşin (hələ ki mövsümün rekordudu) izlədiyi oyunda qapılara qol vurulmasa da, 90 dəqiqə gərgin idman mübarizəsi şəraitində keçdi. Təsadüfi deyil ki, əvvəlki illərdə rəqabətsizlikdən şikayətlənən Qurban Qurbanov matçsonrası mətbuat konfransında rəqibin oyununu yüksək qiymətləndirib və belə qarşılaşmaların ölkə futbolunun inkişafına təkan verəcəyini bildirib. Elə Murad Musayev də komandasının çıxşından razı qalıb. Liderlər arasındakı görüşdə qalib müəyyənləşmədiyindən turnir cədvəlinin yuxarı hissəsində vəziyyət dəyişmədi. “Köhlən atlar” ən yaxın izləyicisini yenə 5 xal qabaqlayır.

Hazırda 3-cü pillədə qərarlaşan “Neftçi” isə “Sumqayıt”la heç-heçədən sonra bu dəfə azarkeşlərinin sevindirdi. “Ağ-qaralar” “doğma divarlar” arasında “Qəbələ”nin qapısından iki cavabsız top keçirdi. Əsas rəqiblərinin “sülh bağlaması” da bakılıların işinə yarayıb. 14 turdan sonra “Neftçi” “Sabah”dan 6, “Qarabağ”dan isə 11 xal geri qalır. 3 xallıq sistemdə bu fərqi aradan qaldırmaq o qədər də çətin görünmür.

“Zirə” də turu qələbə ilə başa vurdu. Rəşad Sadıqovun komandası azarkeşlərinin önündə son turlarda enişdə olan “Səbail”i minimal hesabla üstələdi. Qələbə sayəsində “qartallar” ən yaxın izləyicisi “Qəbələ”dən 2 xal uzaqlaşıb. “Dənizçilər” isə artıq neçə turdu “qara zolaq”dan çıxa bilmir. Mahmud Qurbanovun çalışdırdığı komanda 5 oyundu qələbəyə həsrətdi. 9-cu turda “Sumqayıt”ı yenən “Səbail” son 5 qarşılaşmada 2 heç-heçə ilə yadda qalıb.
Həftəsonu maraqla gözlənilən Qərb derbisində də qalib müəyyənləşmədi. “Kəpəz”lə “Turan Tovuz” çox çalışsa da, azarkeşlərini sevindirə bilmədi. Maraqlıdı ki, Gəncədəki “sülh” hər iki komandanın çalışdırıcısının ürəyincə olub. “Sarı-göylər”in baş məşqçisi Tərlan Əhmədov oyunun tamamında “uduzsaydıq belə, futbolçularımdan razı qalacaqdım” söyləyibsə, “Turan Tovuz”un çalışdırıcısı Ayxan Abbasov “indi-indi oyunumuzu tapırıq” deyib.
Turun açılış oyununda isə “Şamaxı” rəzil gündə olan “Sumqayıt”ı evə əliboş yola saldı. “Şirlər” səfərdə “Turan Tovuz”u yenəndən sonra doğma azarkeşləri önündə hələ də qələbəyə həsrət qalan “kimyaçılar”ı da meydana çıxmağına peşman etdi.

Misli premyer-liqası
2-ci dövrə, 14-cü tur
11 noyabr
Şamaxı - Sumqayıt 4:2
12 noyabr
Zirə - Səbail 1:0
Neftçi – Qəbələ 2:0
13 noyabr
Kəpəz – Turan Tovuz 0:0
Sabah – Qarabağ 0:0

1. Qarabağ 14 13 1 0 40-8 40
2. Sabah 14 11 2 1 30-10 35
3. Neftçi 14 9 2 3 28-14 29
4. Zirə 14 7 1 6 16-21 22
5. Qəbələ 14 6 2 6 17-15 20
6. Turan Tovuz 14 4 4 6 10-18 16
7. Səbail 14 2 4 8 11-20 10
8. Şamaxı 14 2 4 8 12-23 10
9. Kəpəz 14 2 3 9 11-29 9
10. Sumqayıt 14 0 5 9 6-23 5

Növbəti turun oyunları: 27 noyabr – Neftçi – Səbail; 28 noyabr – Şamaxı - Kəpəz, Qarabağ – Zirə; 29 noyabr – Turan Tovuz – Sabah, Sumqayıt – Qəbələ.
Bombardirlər: Ramil Şeydayev, Musa Qurbanlı ( hər ikisi "Qarabağ") – 11, Coy-Lens Mikels (Sabah) – 7.

RƏŞAD