Ötən həftənin cümə günü start götürən premyer-liqanın 25-ci turu bazar günü başa çatdı.

Bəribaşdan qeyd edək ki, ilk “üçlük”də yer alan komandalar 25-ci oyun həftəsini itkisiz başa vurdu. Turnir cədvəlində əsas yerdəyişmə aşağı pillələrdə baş verdi.

Qəbələyə səfər edən “Qarabağ” hesabda geri düşsə də, geridönüş etməyi bacardı. Qurban Qurbanovun komandası mövsümdə üçüncü dəfə Elmar Baxşıyevin çalışdırdığı kollektivi məğlub etməklə yadda qaldı. Onu da qeyd etmək yerinə düşər ki, “köhlən atlar”ın “vuran ayaqları” – Musa Qurbanlı və Ramil Şeydayev “qırmızı-qaralar”la matçda qollarının sayını artırmağa nail oldu. Şeydayev iki penaltini dəqiq yerinə yetirməklə Musaya çatdı. Hazırda hər iki futbolçunun hesabında 17 qol var.

Ardıcıl iki oyunda məğlub olan “Sabah”, nəhayət, azarkeşlərini sevindirdi. Cəza səbəbindən hələ ki texniki zonadan uzaq düşən Murad Musayevin baş məşqçisi olduğu kollektiv “Kəpəz”i Gəncəyə əliboş yola saldı. Onu da xatırladaq ki, “sarı-göylər” matçın böyük hissəsini azlıqda keçirmək məcburiyyətində idi. Komandanın qol ümidi Abdullahi Şuaybu 15-ci dəqiqədə meydandan qovuldu. “Bayquşlar” da matçı tam heyətlə başa vura bilmədi. Anatoli Nuriyev paltardəyişmə otağına komanda yoldaşlarından tez yollandı. Ancaq nigeriyalı forvarddan fərqli Nuriyev meydanı tərk edəndə matçın son saniyələri oynanılırdı ki, bu səbəbdən onun “qırmızı”sının qonaqlara heç bir faydası olmadı.

24-cü turda bir çoxlarını təəccübləndirərək “Sabah”ı məğlub edən “Şamaxı” hesabat turunda da sensasiyaya yaxın idi. “Şirlər” “Zirə” ilə matçın ilk yarısında hesabda geri düşsə də, həvəsdən düşmədi. Və bunun nəticəsi kimi fasilədən sonra rəqibi ardıcıl iki dəfə cəzalandırdılar. Ancaq meydan sahibləri Cavid Hüseynov – Vüqar Əsgərli tandeminin çalışdırdığı komandanın növbəti dəfə sensasiya etməsinə imkan vermədi. “Qartallar” çətinliklə olsa da, məğlubiyyətdən qaça bildi.

Bayıldakı “ASCO Arena”da turnir cədvəlinin “zirzəmi”sində yer alan iki komanda üz-üzə gəldi. “Sumqayıt” qələbə qazanacağı halda sonuncu pillədə qərarlaşan “Səbail”dən uzaqlaşa, turnir vəziyyətini bir qədər yaxşılaşdıra bilərdi. “Dənizçilər” isə qalib gələcəyi halda sonuncu pilləni məhz “kimyaçılar”a təhvil verəcəkdi. Küləkli havada baş tutan oyunun maraqlı, qol vəziyyətləri baxımından məhsuldar keçdiyini söyləmək olmaz ki, bu da başadüşüləndi. Şənbə günü hər iki komandadan parlaq oyundan çox nəticə tələb olunurdu. Bərabərsəviyyəli qarşılaşmada qonaqlar sevindi. Samir Abasovun çalışdırdığı komanda son saniyələrdə penaltidən yararlanmaqla oyunu qalib başa vurdu. Meydan sahiblərinin 63-cü dəqiqədə azlıqda qaldığını da vurğulamaq lazımdı.
Tura isə “Bakcell Arena”da nöqtə qoyuldu. Qış fasiləsindən sonra sürət yığan “Neftçi” “Turan Tovuz” üzərində böyükhesablı qələbəyə sevindi. “Ağ-qaralar” hər hissədə iki qol vurmaqla “boz qurdlar”ı qərb bölgəsinə məyus yola saldı. Uzun fasilədən sonra Emin Mahmudovun adını tabloya yazdırmasını xüsusi qeyd etmək lazımdı. Bu görüşdə dubl edən kapitanın ikinci qolu daha yaddaqalan oldu.

Misli premyer-liqası
3-cü dövrə, 25-ci tur
3 mart
Zirə - Şamaxı 2:2
4 mart
Səbail – Sumqayıt 0:1
Sabah – Kəpəz 2:0
5 mart
Qəbələ - Qarabağ 1:3
Neftçi – Turan Tovuz 4:0
1. Qarabağ 25 20 5 0 61-15 65
2. Sabah 25 17 5 3 53-18 56
3. Neftçi 25 16 4 5 46-22 52
4. Zirə 25 10 6 9 29-33 36
5. Qəbələ 25 8 8 9 29-31 32
6. Turan Tovuz 25 7 5 13 19-33 26
7. Sumqayıt 25 5 6 14 17-40 21
8. Kəpəz 25 4 8 13 24-46 20
9. Şamaxı 25 4 8 13 23-40 20
10. Səbail 25 4 5 16 19-42 17
Bombardirlər: Musa Qurbanlı, Ramil Şeydayev ( hər ikisi "Qarabağ") – 17, Emin Mahmudov (Neftçi) - 13, Coy-Lens Mikels (Sabah) – 12, Aleksey Kaşuk (Sabah) – 10.
Növbəti turun oyunları: 10 mart – Sabah – Sumqayıt, Kəpəz – Zirə; 11 mart – Turan Tovuz – Qəbələ, Qarabağ – Səbail; 12 mart – Şamaxı – Neftçi.

RƏŞAD