Ötən həftə start götürən 24-cü tur dünən başa çatdı. Sürpriz nəticələrin qeydə alındığı 24-cü oyun həftəsində azarkeşlər bir-birindən maraqlı oyunlar izlədi.

Turun ilk hakim fiti Tovuzda səsləndi. “Turan Tovuz” son 4 oyunda qələbəyə həsrət qalan “Zirə”ni qonaq edirdi. “Qartallar”dan fərqli “boz qurdlar” bu oyuna daha yaxşı əhval-ruhiyyədə hazırlaşmışdı. Ancaq Bakıətrafı qəsəbə təmsilçisi ilə görüşdə tovuzlular üçoyunluq qələbə seriyasını davam etdirə bilmədi. Rəşad Sadıqovun baş məşqçisi olduğu kollektiv ilk yarıda vurduğu iki qolla matçın taleyini həll edə bildi.

Cümə günü keçirilən ikinci qarşılaşma “ASCO Arena”da baş tutdu. Ötən tur hesabına 3 xal yazdıran “Qəbələ” “Səbail”in qonağı idi. Qonaqlar ilk yarıda Qustavo de Fransanın avtoqolu ilə hesabda önə çıxsalar da, qış fasiləsindən sonra “doğma divarlar” arasında keçirdiyi iki oyundan 3 xalla ayrılan “dənizçilər” bu dəfə də meydanı məğlub olmadan tərk etdi. 4 qol vurulmasına baxmayaraq, qalibi müəyyənləşdirmək mümkün olmadı.
Turun ən böyük sürprizi Şamaxıda qeydə alındı desək, yanılmarıq. Bölgənin eyniadlı təmsilçisi AFFA prezidenti Rövnəq Abdullayevin də canlı izlədiyi qarşılaşmada özündən qat-qat imkanlı, daha usta futbolçulara malik “Sabah”ı məyus edə bildi. Cavid Hüseynov – Vüqar Əsgərli tandeminin çalışdırdığı “şirlər” Amil Yunanovun dublu sayəsində “bayquşlar”ı evə əliboş yola saldı. Mövsümdə 3-cü dəfə məyus olan “Sabah” isə, görünür, “Turan Tovuz”a məğlubiyyətin stressini hələ də üstündən ata bilmir. Cəzalı olduğuna görə oyunu tribunadan izləmək məcburiyyətində qalan Murad Musayevin komandasının enişdə olduğu göz önündədi. Tovuzlularla oyunda olduğu kimi, “Şamaxı” ilə matçda da “tələbələr” hücumda “dişsiz” görünürdü. Müdafiədə Abdulaye Banın və Boyan Letiçin olmaması da sözünü dedi. Ardıcıl ikinci matçda da meydanı məğlub tərk edən “Sabah” bu gedişlə, çətin ki, çempionluq iddiasını davam etdirə bilsin.

Mövsümün ikinci yarısında qeyri-sabit çıxışla yadda qalan “Sumqayıt” da hesabat turunu xalsız başa vuranlar arasındadı. “Kəpəz”i qonaq edən “kimyaçılar” sanki “doğma divarlar” arasında yox, səfərdə oynayırdı. Əvəzində qonaqlar Sumqayıtda özünü Gəncədə oynayırmış kimi apardı. Meydan sahiblərini xaldan edən, heç şübhəsiz, Aydın Bayramov oldu. Düzdü, onun komanda yoldaşlarının da oyunu alınmadı. Samir Abasovun təbirincə desək, futbolçular meydanda ürəklərini qoymadılar. Ancaq qokiperin iki kobud səhvi həlledici oldu və böyük ölçüdə qarşılaşmanın taleyini həll etdi.

Turun mərkəzi oyunu dünən axşam saatlarında, sıx dumanın müşayiəti ilə “Azərsun Arena”da keçirildi. Cari mövsümdə sayca 3-cü Azərbaycan derbisində “Qarabağ” qalib gələcəyi təqdirdə “Sabah”la xal fərqini artıracaq, çempionluq yolunda ciddi addim atacaqdı. “Neftçi” isə 3 xal əldə edəcəyi halda ikinci pillədəki “tələbələr”lə xal fərqini 2-yə endirəcəkdi. Onu da qeyd edək ki, bu komandalar arasında birinci və ikinci dövrədə baş tutan oyunlardan “köhlən atlar” qalib ayrılmışdı. Dünən keçirilən qarşılaşma “ağ-qaralar” üçün yaxşı başladı. İlk yarıda qonaqlar hesabda önə çıxsa da, fasilədən sonra “köhlən atlar” sürəti artırınca Laurentsiu Regekampfın komandası müdafiəyə oturdu. Ancaq bu da bəhrəsini vermədi. Meydan sahibləri avtoqol sayəsində hesabı bərabərləşdirməyi bacardı. Yeri gəlmişkən, ötən tur “Zirə” ilə görüşdə də ağdamlılar məhz son dəqiqələrdə qeydə alınan avtoqol sayəsində hesabına 3 xal yazmışdı. Beləliklə, Azərbaycan derbisi “sülh”lə başa çatdı ki, bu da bakılılardan çox ağdamlıların işinə yaradı. 24-cü tur bombardirlər yarışına da təsir göstərmədi. Premyer-liqanın ən sərrast futbolçuları adlarını tabloya yazdıra bilmədilər.

Misli premyer-liqası
3-cü dövrə, 24-cür tur

24 fevral
Turan Tovuz – Zirə 0:2
Səbail – Qəbələ 2:2

25 fevral
Şamaxı – Sabah 2:1
Sumqayıt – Kəpəz 1:2

27 fevral
Qarabağ – Neftçi 1:1

1. Qarabağ 24 19 5 0 58-14 62
2. Sabah 24 16 5 3 51-18 53
3. Neftçi 24 15 4 5 42-22 49
4. Zirə 24 10 5 9 27-31 35
5. Qəbələ 24 8 8 8 28-28 32
6. Turan Tovuz 24 7 5 12 19-29 26
7. Kəpəz 24 4 8 12 24-44 20
8. Şamaxı 24 4 7 13 21-38 19
9. Sumqayıt 24 4 6 14 16-40 18
10. Səbail 24 4 5 15 19-41 17

Bombardirlər: Musa Qurbanlı (Qarabağ) – 16, Ramil Şeydayev (Qarabağ) – 15, Coy-Lens Mikels (Sabah) – 12, Emin Mahmudov (Neftçi) – 11, Aleksey Kaşuk (Sabah) – 10.

Növbəti turun oyunları: 3 mart – Zirə - Şamaxı; 4 mart – Səbail – Sumqayıt, Sabah – Kəpəz; 5 mart – Qəbələ - Qarabağ, Neftçi – Turan Tovuz.

RƏŞAD