“Turun ən yaxşı komandası” nominasiyası təsis olunsaydı, heç şübhəsiz, “Kəpəz”ə verilərdi.

Football-plus.az Tərlan Əhmədovun çalışdırdığı komanda “Qarabağ”a uduzmamaqla yanaşı, çox parlaq, intizamlı oyunla yadda qaldı. Liderlə “sülh bağlayan” “sarı-göylər” heç-heçə sayəsində turnir cədvəlinin sonuncu pilləsini də tərk etdi. “Qarabağ” isə mövsümdə üçüncü dəfə bərabərə qaldı. Futbolda “daim qalib gələcəksən” anlayışı yoxdu. Ağdamlıların səfərdə xal itirməsi dünyanın sonu deyil. Sadəcə, ötən həftə qeyd etdiyimiz kimi, Qurban Qurbanovun yetirmələri qış fasiləsindən sonra payızda gördüyümüz komandanın kölgəsini xatırladır. Gəncədəki görüş bir daha göstərdi ki, “Qarabağ” sıx oynayan, böyük qüvvə ilə müdafiə olunan rəqibin qapısına yaxın düşməkdə çətinlik çəkir. Gəncədəki oyunda ağdamlılar adına yeganə sevindirici məqam Musa Qurbanlının bombardirlər yarışında Ramil Şeydayevə çatmasıdı. Artıq hər iki futbolçunun hesabında 15 qol var.

Ötən tur “Zirə”ni minamal hesabla yenən “Neftçi” bu dəfə “Sumqayıt”ı evə əliboş yola saldı. “Ağ-qaralar” baxımlı oyun sərgiləməsə də, hesabına daha 3 xal yazdı. Fasilədən sonra “kimyaçılar”ın oyununda inkişaf sezilir. Samir Abasov dinamik komanda formalaşdırmağı bacarıb. Ancaq qol vurmaq baxımından “gənclik şəhəri” təmsilçisi axsayır. “Neftçi” ilə qarşılaşmada da bunu görmək mümkün idi.

Qış fasiləsində “transfer bazarı”nda ən fəallardan olan “Zirə” azarkeşlərini sevindirə bilmir. Rəşad Sadıqovun komandası hesabat turunda iki əsas stopperi olmadan meydana çıxan “Qəbələ” ilə heç-heçə etdi. “Qartallar” debütdə geri düşsələr də, geridönüş etməyi bacardılar. Hətta ilk yarıda qaçırılan penalti də var idi. Ancaq “qırmızı-qaralar” sona yaxın turnir cədvəlində qonşu olduğu komandadan 1 xal qopara bildi. “Zirə” ilə “Qəbələ” arasındakı 5 xal fərqi qorundu. Əvəzində turu qələbə ilə başa vuran “Neftçi” Rəşad Sadıqovun komandasından bir qədər də uzaqlaşdı. Artıq flaqmanı “qartallar”dan 12 xal ayırır.

Turnir cədvəlində qonşu olan digər komandaların oyununda isə qonaqlar sevindi. “Turan Tovuz” ilk dövrədə olduğu kimi, bu dəfə də Şamaxıdan qələbə ilə dönməyi bacardı.

21-ci oyun həftəsinin son görüşündə “Sabah”la “Səbail” üz-üzə gəldi. Murad Musayevin yetirmələri artıq 1-ci hissədə matçın taleyini həll etdi. İlk yarıda qapısında 3 top görən “dənizçilər”in “bayquşlar”la görüşdə geridönüş edəcəyini heç kim gözləmirdi. Fasilədən sonra daha bir qol vuran “Sabah” böyükhesablı qələbə sayəsində “Qarabağ”la aradakı xal fərqini 5-ə endirdi. Coy-Lens Mikels isə mövsümdə 12-ci dəfə fərqlənməklə bombardirlər yarışında sona qədər iddialı olacağını ortaya qoydu.

Misli premyer-liqası
3-cü dövrə, 21-ci tur
4 fevral
Kəpəz – Qarabağ 1:1

5 fevral
Zirə- Qəbələ 2:2
Neftçi – Sumqayıt 2:0

6 fevral
Şamaxı – Turan Tovuz 0:1
Sabah – Səbail 4:0

1. Qarabağ 21 18 3 0 55-12 57
2. Sabah 21 16 4 1 49-13 52
3. Neftçi 21 14 2 5 38-21 44
4. Zirə 21 9 5 7 25-28 32
5. Qəbələ 21 7 6 8 24-25 27
6. Turan Tovuz 21 5 5 11 15-27 20
7. Şamaxı 21 3 7 11 17-33 16
8. Sumqayıt 21 3 6 12 13-36 15
9. Kəpəz 21 2 8 11 19-39 14
10. Səbail 21 3 4 14 15-36 13

Bombardirlər: Ramil Şeydayev, Musa Qurbanlı (hər ikisi "Qarabağ") – 15, Coy-Lens Mikels (Sabah) – 12.

Növbəti turun oyunları: 10 fevral – Qəbələ - Neftçi; 11 fevral – Turan Tovuz – Kəpəz, Qarabağ – Sabah; 12 fevral – Səbail – Zirə, Sumqayıt – Şamaxı.

RƏŞAD