Fevralın 14-də “Tottenhem”in qapısından bir top keçirən “Milan” ÇL-də 2012-ci ildən sonra ilk dəfə İngiltərə klubuna qalib gəlmişdi.

“Football-plus.az” xəbər verir ki, İtaliya nəhəngi onda 1/8 finalda “Arsenal”ı 4:0 hesabıyla məğlub etmiş, britaniyalılarla qarşılaşdığı sonrakı 5 oyunun hamısında azı iki top buraxaraq uduzmuşdu. İtaliyadakı ilk matçda Diasın vurduğu qolun “Milan”ın mərhələ adlaması üçün kifayət edəcəyi bir qədər çətin görünürdü. Ancaq A seriyasının son çempionu minimal üstünlüyünü cavab görüşündə qorumağı bacardı.

“Tottenhem” ilk dəqiqələrdən rəqibi təzyiq altında saxlasa da, qonaqların belə başlanğıca hazır olduğu görünürdü. Əslində londonluların həmlələri milanlılar üçün heç də qarşısıalınmaz deyildi. Kontenin çalışdırdığı komanda hücumda parlaq oyun sərgiləməkdə çətinlik çəkirdi. Meydan sahibləri ilk hissədə praktiki olaraq matçı əla keçirən Menyanın qoruduğu qapı qarşısında real qol vəziyyəti yarada bilmədilər. Əvəzində İtaliyanın son çempionunun hesabı açmaq şansı oldu, lakin Messias əlverişli vəziyyəti boşa verdi.

Fasilədən sonra oyun daha maraqlı alındı. “Tottenhem” əsasən mövqe hücumlarına əl atdı, amma “Milan”ın əks-hücumları daha təhlükəli alınırdı. 77-ci dəqiqədə Romeronun növbəti xəbərdarlığa görə komandasını meydanda on nəfərlə qoyması qonaqların işinə yaradı. Azlıqda sona qədər mübarizə aparan londonlular son dəqiqələrdə hesabı açmağa çox yaxın oldular. Lakin Menyan Keynin baş zərbəsinə əla reaksiya verdi. Dərhal əks-hücum quran milanlıların oyunçusu Orici isə topu dirəyə vurdu. Nəticədə qolsuz heç-heçə Pyolinin komandasını 1/4 finala çıxardı.

Faktlar
* “Milan” ÇL-də 11 ildən sonra ilk dəfə 1/4 finala vəsiqə qazandı. İtaliya klubu sonuncu dəfə bu mərhələdə 2012-ci ildə oynamış və iki oyunun (0:0, 1:3) nəticəsinə əsasən “Barselona”ya uduzmuşdu. “Milan”ın ötən müddətdə iki dəfə mübarizəni 1/8 finalda dayandırdığını da xatırladaq.
* “Tottenhem” öz meydanında bütün turnirlərdə 147 oyundan sonra ilk dəfə rəqibi ilə 0:0 hesablı heç-heçə etdi. Paytaxt komandası sonuncu dəfə evdə 2017-ci il sentyabrın 16-da “Suonsi” ilə matçda qolsuz “sülh”ə razılaşmışdı. Qeyd edək ki, “Tottenhem” onda ev oyununu “Uembli”də keçirmişdi. Londonluların bütün turnirlərdə öz meydanındakı matçda 5 il 173 gündən sonra qolsuz heç-heçə qeydə alındı. Paytaxt klubunun 2019-cu ildən rəqiblərini “Tottenhem Hotspur Stedium”da qəbul etdiyini də bildirək.