Turun son oyununda “Neftçi” ilə “Turan Tovuz” üz-üzə gəldi. Cari mövsümdə baş tutan əvvəlki iki qarşılaşmada “boz qurdlar” “ağ-qaralar”ın əsəbləri ilə oynamağı bacarmışdı.

Birinci dövrədə paytaxtda keçirilən matç heç-heçə bitmişdisə, Tovuzdakı qarşılaşmada qonaqlar son dəqiqələrdə vurduğu qolla 3 xal qazanmışdı. Bu səbəbdən srağagünkü oyunun da meydan sahibləri üçün çətin keçəcəyini gözləmək olardı. Ancaq ehtimalların əksinə, paytaxt təmsilçisi çox asan, hətta belə demək mümkünsə, rahat qələbə qazandı.

Bazar günü Regekampfın yetirmələrinin oyununda çox şey yox, demək olar, hər şey alındı. Həm həmlələr göz oxşayırdı, həm də zərbələr “çərçivə”yə gedirdi. Xüsusilə Mahmudovun 2-ci, “Neftçi”nin 4-cü qolu mükəmməl idi. 84-cü dəqiqəyə kimi isə bakılılar artıq üç dəfə qonaqları meydanın mərkəzinə dəvət etmişdi. İlk yarıda Sezar və Emin, fasilədən sonra Mateus Tərlanı topu tordan çıxarmağa məcbur etmişdi.

Böyük hesabla yenilən tovuzluların asan təslim olduğunu da söyləmək olmaz. Hesabda geri düşmələrinə baxmayaraq, Ayxan Abbasovun yetirmələri də əllərini yanlarına salmayaraq hücum etməkdən çəkinmirdi. Hesab 2:0 olanda Runi Eva fərqi minimuma endirsə də, ofsayd səbəbindən qol qeydə alınmadı. Kim bilir, həmin an hesab dəyişsəydi, matçın sonluğu necə olcaqdı...

Henrinin son dəqiqələrdəki zərbəsi isə dirəkdən döndü. Ancaq matçın ədalətli yekunu meydan sahiblərinin zəfəri idi ki, məhz belə də oldu. Ola bilsin, həmin gün “Neftçi”nin günü idi və ya əksinə, tovuzluların günü deyildi. Sonda 3 xal “ağ-qaralar”ın hesabına yazıldı ki, bununla da “Neftçi “Sabah” və “Qarabağ”la xal fərqinin artmasına imkan vermədi.

Gözdən qaçmadı

* Oyunun başlamasına dəqiqələr qalmış 100-ə yaxın tovuzlu azarkeş stadiondan kənarda qalmışdı. Polis onları bir-bir yoxlayır, bileti olmayanları geri qaytarırdı ki, bu da əlavə vaxt itkisi idi. Məhz bu səbəbdən tovuzluların bəziləri hakimin start fitindən təxminən 10 dəqiqə sonra tribunada yerini ala bildi.

* Matç Bakıda keçirilsə də tovuzlu azarkeşlər “Bakcell Arena”da mükəmməl ab-hava yaratmışdı. Komanda uduzsa da, fanatlar hakimin final fitindən sonra futbolçuları tribunaya çağırıb, alqışlarla yola saldı. Qara zurna və nağaranın səsi isə stadionu başına götürmüşdü.

RƏŞAD