Premyer-liqada 7-ci tura yekun vuruldu.

Yığmanın Millətlər Liqasındakı oyunlarına görə yaranan “kiçik tənəffüs” ərəfəsində baş tutan görüşlərdə, demək olar ki, sürpriz qeydə alınmadı. “Zirə” – “Qarabağ” matçında yaşanan “qol yağışı”nı istisna etsək.

“Qartallar” cari mövsümdə ilk dəfə rəqibi öz meydanında qəbul edirdi. Rəqibin “Qarabağ” olması da azarkeşləri stadiona gətirmiş, tribunalarda, demək olar ki, boş yer qalmamışdı. İlk hissədən sonra ən bədbin “Zirə” azarkeşi düşünməzdi ki, ikinci yarıda “köhlən atlar” “qartallar”a qanad açmağa imkan verməyəcək. Ancaq sən saydığını say, gör həftəiçi “Nant”ın başına oyun açan “Qarabağ” nə sayır. İlk yarıda komandalar hərəyə bir dəfə fərqlənsə də, ikinci 45 dəqiqədə ağdamlılar meydan sahiblərinin qapısından daha 6 top keçirməklə mövsümdə hələ ki ən böyükhesablı qələbəsini rəsmiləşdirdi. Musa Qurbanlının poker etdiyini də vurğulamaq lazımdı. Rəşad Sadıqovun komandasının bu noqdaundan özünə necə gələcəyi çox maraqlıdı. Yaxşı ki, premyer-liqada növbəti tur təxminən 2 həftə sonra baş tutacaq. Psixoloqlar demişkən, Sadıqovun komandasını “panik atak”dan çıxarmaq üçün vaxtı olacaq.

Medallara iddialı “Sabah”ın “Turan Tovuz”la görüşdə xal itirəcəyi inandırıcı görünmürdü ki, ehtimallar özünü doğrultdu. Murad Musayev cəza səbəbindən texniki zonada yer almasa da, komandası çətinlik çəkmədən növbəti 3 xalı hesabına yazdı.
“Neftçi”də turu qələbə ilə başa vurdu. “Ağ-qaralar” “Sabah” kimi asan qələbə qazanmasa da, hər halda, Laurentsiu Regekampfın komandası 90 dəqiqənin tamamında istəyinə nail oldu. Mahmud Qurbanovun “dənizçilər”i ilk hissədə qapının toxunulmazlığını təmin etdi. İkinci yarıda ustalıq səviyyəsi özünü göstərdi və qonaqlar kiçik fasiləyə yüksək əhval-ruhiyyədə yollandı.

“Sumqayıt”ın qara günləri davam edir. Aleksey Baqanın rəhbərlik etdiyi “kimyaçılar”a növbəti sillə “Qəbələ”dən gəldi. “Qırmızı-qaralar” oyunun əvvəlində vurduğu bir qolla mövsümdə 12-ci xalı hesabına yazdı və qələbə sayəsində 4-cü pillədəki yerini qorudu.
Gəncəli azarkeşlər də, nəhayət, “Kəpəz” adına sevindi. Tərlan Əhmədovun rəhbərliyi altında ikinci matçına çıxan “sarı-göylər” özü kimi qələbə hesabını aça bilməyən “Şamaxı” ilə qarşılaşırdı. Çoxları gəncəlilərin ancaq yerlilərdən qurulan “şirlər”i asanlıla yenəcəyini düşünsə də, ilk 3 xal Tərlan bəyin yetirmələri üçün heç də asan başa gəlmədi. Qonaqlar hesabı açan tərəf oldu. Ancaq təcrübəsizlik və keyfiyyət növbəti dəfə özünü göstərdi. İkinci yarıda “Kəpəz”in legionerləri ön plana çıxdı.

Misli premyer-liqası
1-ci dövrə, 7-ci tur
16 sentyabr
Sabah – Turan Tovuz 3:1
Səbail – Neftçi 0:2
17 sentyabr
Qəbələ - Sumqayıt 1:0
18 sentyabr
Kəpəz – Şamaxı 2:1
Zirə - Qarabağ 1:7
1. Qarabağ 6 6 0 0 21-5 18
2. Neftçi 7 6 0 1 16-6 18
3. Sabah 7 5 1 1 16-7 16
4. Qəbələ 7 4 0 3 11-7 12
5. Turan Tovuz 6 3 1 2 5-5 10
6. Zirə 7 3 1 3 9-15 10
7. Səbail 7 1 2 4 7-10 5
8. Kəpəz 7 1 0 6 6-18 3
9. Sumqayıt 7 0 3 4 1-10 3
10. Şamaxı 7 0 2 5 4-13 2

Bombardirlər: Ramil Şeydayev, Musa Qurbanlı (hər ikisi "Qarabağ") – 7, Coy-Lens Mikels (Sabah) – 5, Runi Eva (Turan Tovuz) – 4.
Növbəti turun oyunları: 30 sentyabr – Səbail – Qəbələ; 1 oktyabr – Qarabağ – Neftçi, Turan Tovuz – Zirə; 2 oktyabr – Sumqayıt – Kəpəz, Şamaxı – Sabah.

RƏŞAD