Premyer-liqanın 16-cı turu Azərbaycan derbisiylə start götürdü.

Football-plus.az xəbər verir ki, lider “Qarabağ” “Neftçi”nin qonağı oldu. Matçdan öncə əksər mütəxəssislər, idman yazarları “köhlən atlar”ın bir tur əvvəl “Zirə” ilə oyundakı performansını nəzərə alıb “ağ-qaralar”ın Ağdam təmsilçisindən xal və ya xallar alacağını ehimal edirdi. Ancaq Qurban Qurbanovun komandası sərgilədiyi oyunla növbəti dəfə ölkədə “bir nömrə” olduğunu sübut etdi. Matçın qəhrəmanı heç şübhəsiz, dublla yadda qalan Kadi Borges oldu. Braziliyalı yarımmüdafiəçinin xüsusilə 4-cü qolu çox baxımlı alındı. İvan Brkiçin həmin an səhvi olsa da, xorvatiyalı qolkiper ilk yarıda inamlı oyunu ilə “Neftçi”ni daha böyük hesabla məğlub olmasına imkan vermədi.

Ötən tur “Qarabağ”büdrəməsindən maksimum yararlanan “Sabah” liderlə aradakı xal fərqini 3-ə endirməyi bacarmışdı. Amma Murad Musatevin komandası 16-cı oyun həftəsində gözlənilmədən öz meydanında “Şamaxı” ilə “sülh bağladı” ki, belədə xal fərqi yenidən 5-ə çatdı. “Sabah”ın “Şamaxı” ilə bərabərə qalması hər nə qədər sensasiya kimi qəbul olunsa da, “şirlər”in də haqqını vermək lazımdı. Cavid Hüseynovla Vüqar Əsgərlinin rəhbərlik etdiyi komanda ikinci dövrədə, “Qarabağ”ı nəzərə almasaq, heç bir komandaya uduzmayıb. Bu da onu göstərir ki, bölgənin eyniadlı təmsilçisi düzgün yoldadı.

15-ci turda autsayder “Sumqayıt”la görüşdə xal itirən “Qəbələ” az qala “Səbail”lə görüşdə də azarkeşlərini məyus edəcəkdi. Qəbələdə keçirilən matçda hesabı “dənizçilər” açdı. Ancaq Mahmud Qurbanovun çalışdırdığı kollektiv sona qədər bu üstünlüyü qoruya bilmədi. İlk yarıda “status-kvo”nu bərpa edən “qırmızı-qaralar” fasilədən sonra onlara 3 xal gətirən qolu vurdu. Bu qələbə sayəsində “Qəbələ” “Zirə”nin uzaqlaşmasına imkan vermədi.
“Zirə” isə doğma meydanda “Turan Tovuz”la üz-üzə gəldi. Qonaqların heyətində Kamal Bayramovun “çərçivə”dəki oyununu xüsusi qeyd etmək lazımdı. 37 yaşlı qolkiper ilk yarıda Hamidu Keytanın penaltisini dəf etsə də, fasilədən sonra avtoqola imza atdı. Bəlkə də Kamal olmasaydı, “qaratallar” turun son oyununda daha rahat qələbə qazanacaqdı. “Turan Tovuz” üzərində qələbə Rəşad Sadıqovun komandasını 4-cü pillədə saxladı.
Nəhayət, “Sumqayıt” da qələbəyə sevindi. “Gənclik şəhəri”nin təsmilsçisi səfərdə “Kəpəz”i minimal hesabla üstələdi. “Kimyaçılar” sonuncu dəfə bu il mayın 21-də - ötən mövsümün son turunda qalib gəlmişdi. Həmin gün sumqayıtlılar “Səbail”i 5 cavabsız qolla yenib. 197 gündən sonra qazanılan qələbə yubileylərlə də əlamətdar olub. “Sumqayıt” premyer-liqada 75-ci dəfə qapısını toxunulmaz saxlayıb. Bu görüşlərin 41-i evdə, 34-ü səfərdə keçirilib. Qələbə qolunun müəllifi olan Vurğun Hüseynov isə Azərbaycan çempionatlarında 10-cu dəfə fərqləndi. Təcrübəli müdafiəçi “Qəbələ”də 4, “Turan”la “Sumqayıt”ın hərəsində 3 qol vurub.

Misli premyer-liqası
16-cı tur, 2-ci dövrə
2 dekabr
Neftçi – Qarabağ 0:4
3 dekabr
Qəbələ - Səbail 2:1
Sabah – Şamaxı 1:1
4 dekabr
Kəpəz – Sumqayıt 0:1
Zirə - Turan Tovuz 2:1

1. Qarabağ 16 14 2 0 44-8 44
2. Sabah 16 12 3 1 32-11 39
3. Neftçi 16 10 2 4 31-19 32
4. Zirə 16 8 2 6 18-22 26
5. Qəbələ 16 7 3 6 20-17 24
6. Turan Tovuz 16 4 4 8 11-21 16
7. Şamaxı 16 2 6 8 14-25 12
8. Səbail 16 2 4 10 13-25 10
9. Kəpəz 16 2 4 10 12-31 10
10. Sumqayıt 16 1 6 9 8-24 9

Bombardirlər: Ramil Şeydayev (Qarabağ) – 12, Musa Qurbanlı (Qarabağ) – 11, Emin Mahmudov (Neftçi) – 9.
Növbəti turun oyunları: 13 dekabr – Şamaxı – Zirə, Qarabağ – Qəbələ; 14 dekabr – Kəpəz – Sabah, Sumqayıt – Səbail; 15 dekabr – Turan Tovuz – Neftçi.

RƏŞAD