Premyer-liqanın 23-cü turunu geridə qoyduq.

Heç şübhəsiz, sürprizin ünvanı Masazırdı. Çempionluq yolunda “Qarabağ”ı qarabaqara izləyən “Sabah” evdə “Turan Tovuz”a boyun əyməklə çoxlarını təəccübləndirdi. Onu da qeyd edək ki, cari mövsümdə “bayquşlar” öz meydanında heç kimə uduzmamışdı. Tovuzluların isə qələbə seriyası davam edir. Onlar ardıcıl üçüncü matçı da 3 xalla başa vurdu. Maraqlıdı ki, Abbasovun çalışdırdığı komanda bu oyunların heç birində qapısında qol görməyib.

Turun mərkəzi oyunu isə Zirədə keçirildi. Qış fasiləsindən sonra meydana çıxdığı 4 qarşılaşmanın 3-də məğlub olan “Zirə” həftəiçi Konfrans Liqasında oyun keçirən “Qarabağ”la görüşdə uğursuzluğa son qoymaq istəyirdi. İnsafən, Rəşad Sadıqovun komandası liderə qarşı heç də pis oyun sərgiləmədi. Ancaq son dəqiqələrdə gələn avtoqol “qaratallar”ı növbəti dəfə xalsız qoydu. Qəsəbə təmsilçisinin bu məğlubiyyəti bir gün əvvəl “doğma divarlar” arasında “Sumqayıt”ı yenən “Qəbələ”nin işinə yaradı. “Qırmızı-qaralar” “kimyaçılar” üzərində qələbə ilə həm hesabına 3 xal yazdırdı, həm də 4-cü pillədəki “Zirə” ilə xal fərqini 1-ə endirdi. Ötən dəfə qeyd etdiyimiz kimi, Rəşad Sadıqov vaxtında komandasını toparlaya bilməsə, “Zirə”nin avrokuboklara yollanması çətin olacaq.

Son üç oyunda qol buraxmayan “Neftçi” “Səbail”lə matçda da qapısını toxunulmaz saxlamağı bacardı. “Bakcell Arena”da baş tutan görüşdə meydan sahibləri, demək olar ki, çətinlik çəkmədən qalib gəldi. “Ağ-qaralar”ın kapitanı Emin Mahmudov penaltidən fərqlənməklə mövsümdə 11-ci qolunu vurdusa, Mateus Saldanya yeni komandasında 4-cü oyunda 2-ci dəfə fərqləndi.

Gəncədə premyer-liqanın autsayderləri üz-üzə gəlsə də, azarkeşlər çox maraqlı, məhsuldar oyun izlədi. Son vaxtlar düşərgəsində gərginlik yaşanan “Kəpəz” üçün “Şamaxı” ilə görüş həyati önəm daşıyırdı. Kuluarlarda gəzən söz-söhbətə görə, “sarı-göylər” məğlub olacağı təqdirdə baş məşqçi Tərlan Əhmədov istefaya göndəriləcəkdi. Ancaq yetirmələri onun üzünü agartdılar. Qonaqlar iki dəfə hesabı bərabərləşdirsə də, bundan artığına gücləri çatmadı və “Kəpəz” oktyabrın 10-na təsadüf edən “Səbail”lə görüşdən sonra ilk qələbəsini qazandı.

Misli premyer-liqası
3-cü dövrə, 23-cü tur

17 fevral
Kəpəz – Şamaxı 3:2

18 fevral
Qəbələ - Sumqayıt 2:1
Neftçi – Səbail 3:0

19 fevral
Sabah – Turan Tovuz 0:2
Zirə - Qarabağ 0:1

1. Qarabağ 23 19 4 0 57-13 61
2. Sabah 23 16 5 2 50-16 53
3. Neftçi 23 15 3 5 41-21 48
4. Zirə 23 9 5 9 25-31 32
5. Qəbələ 23 8 7 8 26-26 31
6. Turan Tovuz 23 7 5 11 19-27 26
7. Sumqayıt 23 4 6 13 15-38 18
8. Kəpəz 23 3 8 12 22-43 17
9. Şamaxı 23 3 7 13 19-37 16
10. Səbail 23 4 4 15 17-39 16

Bombardirlər: Musa Qurbanlı (Qarabağ) – 16, Ramil Şeydayev (Qarabağ) – 15, Coy-Lens Mikels (Sabah) – 12, Emin Mahmudov (Neftçi) – 11.
Növbəti turun oyunları: 24 fevral – Turan Tovuz – Zirə, Səbail – Qəbələ; 25 fevral – Şamaxı – Sabah, Sumqayıt – Kəpəz; 27 fevral – Qarabağ – Neftçi.

RƏŞAD