"Qarabağ" bu gün doğma meydanda növbəti avrokubok matçını keçirəcək. Rəqib Belçika "Gent"idi. Qış fasiləsindən heyətində dəyişikliklər olan, əsas qapıçısı Şahruddin Məhəmmədəliyevi zədə səbəbindən itirən təmsilçimizi çox ağır oyun gözləyir.

"Football-plus.az" saytı olaraq "köhlən atlar"ın bu qarşılaşmada şanslarını dəyərləndirmək üçün Yunis Hüseynova tribuna verdik. Təcrübəli mütəxəssis qələbəyə inandığını söylədi:

"Neçə aydı avrokubok matçı izləmirik. İnanıram ki, bu gün gərgin, bir o qədər də maraqlı oyunun şahidi olacağıq. Çoxları narahatlıq keçirir ki, Kadi, Ovusu komandanı tərk edib, Şahruddin sıradan çıxıb və bu bizə baha başa gələcək. Mən isə belə düşünmürəm. Əvvəla onu deyim ki, futbol kollektiv oyundu. Bir-iki nəfər olmayacaq deyə, “komanda batdı” düşüncəsi düzgün deyil. Kadi, Ovusu kimi futbolçuların performansına kölgə salmaq istəmirəm, amma "Qarabağ"ın oyunu 1-2 futbolçunun üzərində qurulmayıb. Düşünürəm ki, gedənlərin yeri çox da hiss olunmayacaq. Heyətə yeni cəlb olunanların da özünü yaxşı tərəfdən göstərəcəyinə inanıram. Yalnız qapı xətti bir qədər risklidi. Amma əminəm ki, Qurban müəllim məşqlərdə bunun üzərində çox çalışıb və daha hazırlıqlı qapıçıya şans veriləcək. Komandamızın "Gent" səddini keçəcəyini düşünürəm. Hamılıqla Ağdam təmsilçisinin qələbəsinə inanmalı və dəstək verməliyik".

ABDULLA İSMAYILOĞLU