Şahin Diniyev əksəriyyətin əleyhinə çıxdı - AÇIQLAMA
Dünən Çempionlar Liqasının 3-cü təsnifat mərhələsində "Qarabağ" doğma meydanda "Ferentsvaroş"u qəbul etdi.
Tofiq Bəhramov adına Respublika stadionunda möhtəşəm dəstəyə bağmayaraq, "köhlən atlar" qələbə qazana bilmədi və matç 1:1 hesabı ilə yekunlaşdı.
"Football-plus.az" saytı olaraq oyunla bağlı Şahin Diniyevin fikirlərini öyrəndik:
"Əvvəla, dünənki istini nəzərə alsaq, futbol havası deyildi. Məhz belə bir istidə meydana çıxaraq gözəl oyun nümayiş etdirən hər iki komandaya və onların baş məşqçisinə dərin təşəkkürümü bildirirəm. Əksəriyyət düşünür ki, "Qarabağ"ın heyətində itkilər olmasaydı, qələbə qazanacaqdı. Mən bu fikirlə qətiyyən razı deyiləm. Çünki dünən meydandakı futbolçuların hamısı hədsiz istiyə, güclü rəqibə baxmayaraq, savaşdı. Bəhlul Mustafazadə ilə Bədavi Hüseynov bəlkə də ən yaxşı oyunlarından birini keçirdi. Bəlkə də Kadi meydanda olsaydı, hücumların təşkilində kreativliyi artırardı. Amma dünən oyuna diqqətlə baxsaq, Medina, Maksim və Riçardın yoxluğu hiss olunmadı. Qurban Qurbanovun yetirmələri "Lex" və "Sürix"ə qarşı necə oynadılarsa, Macarıstan təmsilçisinə qarşı da elə mübarizə apardılar. Komandamız yaxşı təsir bağışladı. Ağdam təmsilçisi üçün artıq ev-səfər oyunu anlayışı qalmayıb. Statistikaya nəzər yetirsək, "köhlən atlar" özündən güclü rəqibləri məhz səfər matçlarında mübarizədən kənarlaşdırıb. Ona görə də "Qarabağ"ın səfərdə daha yaxşı oynayacağını gözləyirəm. Düşünürəm ki, matçın taleyi Budapeştdə həll olunacaq və sevinən tərəf biz olacağıq".
ABDULLA İSMAYILOĞLU
Digər xəbərlər
