Misli premyer-liqasında çempionluq uğrunda mübarizə qızışır.

“Qarabağ” turnir cədvəlində 57 xalla liderliyini qoruyur. “Sabah” isə son matçda “Səbail” üzərində parlaq qələbə qazanmaqla xalını 52-yə çatdırdı. Azarkeşlər fevralın 11-də keçiriləcək “Qarabağ” - “Sabah” qarşılaşmasını səbirsizliklə gözləyir. Daha doğrusu, oyunun nəticəsini.

"Football-plus.az" olaraq mütəxəssislərlə əlaqə saxladıq, şansları dəyərləndirmələrini istədik.

Sənan Qurbanov:

“Görünən budu ki, “Sabah” qış fasiləsini dəyərləndirməyi bacarıb. Transfer etməsələr belə, Murad Musayev öz üslubunu futbolçularına tam aşılayıb. Qarşıdakı oyunda bir çox azarkeşin favoriti “Sabah”dı. Masazır klubu qalib gəlsə, ağdamlılar sözün əsl mənasında dalana dirənəcək. Ovusu Kvabena, Kadi Borges kimi oyunçuların “Qarabağ”ı tərk etməsi, Şahruddin Məhəmmədəliyevin zədələnməsi, bununla yanaşı, yeni transferlər, dəyişikliklər komanda ruhuna təsirsiz ötüşməyə bilməzdi. “Qarabağ” güclü komanda olduğunu dəfələrlə sübuta yetirib.

Düşünürəm ki, “köhlən atlar” qısa zamanda əvvəlkindən daha effektli formada azarkeşlərin qarşısına çıxacaq. Hətta buna “Sabah”la oyunda da şahidlik edə bilərik. Çünki “köhlən atlar” çətin sınaqlardan üzüağ çıxmağı bacarır. Mənim üçün bu matçın favoriti “Qarabağ”dı”.

Aslan Kərimov:

“Qarabağ” çox çətin dövrdən keçir. Komandanı qarşıda bir neçə məsul oyun gözləyir. “Gent”lə matçı da nəzərə alsaq, deyə bilərik ki, “köhlən atlar” ağır sınaq qarşısındadı. Buna baxmayaraq, “Sabah” qələbə üçün böyük şücaət göstərməlidi. Çünki “Qarabağ” əsas heyətlə oynasa, bakılıların işi asan olmayacaq. “Sabah”da optimal heyətin formalaşdığını desək, yanılmarıq. İndiyə qədər izlədiyimiz bütün matçlarda futbolçuların bir-birini düzgün başa düşdüyünü, komandanın güclü mövqe oyunçularına sahib olduğunu, xüsusilə sağ cinah yarımmüdafiəçisi Aleksey Kaşukun effektli performansını müşahidə etmişik.

Sadaladığım məqamlara əsasən deyə bilərəm ki, oyun çox həyəcanlı keçəcək və azarkeşlərin zövqünü oxşayacaq. Hər iki komanda, demək olar ki, bərabər gücdədi. Düşünürəm ki, hücumameyilli oyunla yadda qalan “Sabah” müdafiədə boşluqlar versə, “Qarabağ” bunu bağışlamayacaq. “Köhlən atlar” ən kiçik fürsətlərdən belə məharətlə yararlanır. Bunu nəzərə alaraq deyə bilərəm ki, üstünlük az da olsa, “Qarabağ”ın tərəfindədi. Təbii ki, daha doğrusunu zaman göstərəcək”.

KƏNAN BAHADIR