Türkiyədə yüz ilin fəlakəti adı verilən dəhşətli zəlzələdə dünyasını dəyişənlərin sayı artıq 24 mini ötüb.

Təbii ki, dünyanın bir çox ölkələri bu çətin gündə Türkiyəyə bacardığı qədər yardım etməyə çalışır. Amma sirr deyil ki, qardaş ölkə üçün ən çox can-fəşanlıq göstərən və yardım etməyə çalışan məhz Azərbaycandı. İndiyə qədər axtarış-xilasetmə əməliyyatlarına dəstək məqsədi ilə Fövqaladə Hallar Nazirliyinin 420 nəfərlik şəxsi heyəti 4 xüsusi təlim keçmiş itlərlə birlikdə zəlzələ bölgəsinə göndərilib. Bizim qədər xilasedici göndərən ölkə yoxdu. Bundan başqa ölkəmizdən indiyə qədər Türkiyəyə 100-dən çox yardım TIR-ı göndərilib və onların sayının 200-ə çatacağı gözlənilir. Təsadüfi deyil ki, Türkiyə futbolunun tanınmış simaları da Azərbaycana xüsusi təşəkkürünü bildirib. Söhbət ilk növbədə ''Fənərbaxça''nın prezidenti Əli Koç və ''Qalatasaray''ın baş məşqçisi Okan Burukdan gedir. Koç ''CBC Sport'' kanalına bunları deyib: ''Həm öz, həm də ''Fənərbaxça''nın adından bütün Azərbaycan xalqına yardımlarına görə təşəkkürümü və minnətdarlığımı bildirirəm''. Buruk isə paylaşdığı videoda bunları deyib: ''Bütün azəri qardaşlarımızı yanımızda görməkdən böyük məmnunluq duyacağıq. Bir millət iki dövlət olaraq bu çətin günümüzdə sizin də dəstəyiniz bizim üçün çox önəmlidi. Hamınıza təşəkkür edirəm''. Bundan başqa ''Fənərbaxça''nın idarə heyətinin üzvü Can Gebetaş və klubun yarımmüdafiəçi Mərt Hakan Yandaş da yardımlarına görə Azərbaycana təşəkkür edib.