Daha öncə “İstanbul BŞ” ilə çempion olmaqla tarix yazan Okan Buruk adını artıq indidən “Qalatasaray”ın tarixinə yazdırmağı bacarıb.

Football-plus.az xəbər verir ki, “Cim-Bom” 9-u superliqada, 3-ü kubokda olmaqla son 12 rəsmi oyunun hamısında qalib gəlib.

“Qalatasaray” tarixində 1959-dan, yəni Türkiyədə peşəkar səviyyədə çempionat keçirilməyə başlandığı vaxtdan bəri ardıcıl 12 rəsmi oyunda qələbə qazanan məşqçi olmamışdı! Buruk gələn tur daha bir möhtəşəm göstəriciyə nail ola bilər.

Belə ki, indiyə qədər klub tarixində çempionat çərçivəsində heç vaxt ardıcıl 10 qələbə qazanılmayıb. Mustafa Dənizlinin 1987/88 və Fatih Terimin 2011/12-dəki “Qalatasaray”ı 9-cu qələbədən sonra büdrəmişdi.