Türkiyədə baş verən zəlzələ ölkəmizdə də hər kəsi sarsıdıb. Qonşu-qardaş ölkəyə bacardığımız yardımı göstəririk. Azərbaycan hər vasitəylə Türkiyənin yanındadı. Futbolumuzda da yetərincə türk var.

"Football-plus.az" olaraq bunu nəzərə alıb onlara tribuna verdik.

Camal Bülbül ("Neftçi" akademiyasının direktoru):

"Öncəliklə başımız sağ olsun. Yaralılarımıza qısa müddətdə şəfa diləyirəm. Dağıntılar altında qalanların tezliklə xilas edilməsini arzulayıram. Həqiqətən də çox böyük faciə ilə qarşı-qarşıyayıq. Ümid edirəm ki, gərəkli işlər görüləcək və bir daha belə acılar yaşamayacağıq. Zəlzələylə bağlı ölkəmizin hər yerində hər şey dayanmış vəziyyətdədi, 4 bir tərəfdən bölgələrə yardımlar edilir. Çox sayda uçan, dağılan bina var, xilasedicilər hər yerə vaxtında çatmağa çalışır. Buna rəğmən, dağıntılar altında və küçələrdə qalan vətəndaşlarımız əlverişsiz hava şəraitində kömək gözləmək məcburiyyətindədi. Buna görə hələ də yardıma ehtiyacı olanlar çoxdu.

Bütün dünyadan dəstək gəlir, amma Azərbaycan Türkiyəyə ilk yardım göndərən dövlətdi. Bü gün cənab İlham Əliyev daha 370 nəfərlik heyətlə 2-ci xilasetmə, dəstək qruplarını ölkəmizə göndərdi. Bundan əlavə, çalışdığım "Neftçi"nin də yardım kampaniyalarına start verməsi məni çox xoşbəxt edir. Azərbaycan ilə Türkiyənin yalnız sözdə qardaş ölkə olmadığını, zəlzələnin ilk günündən bu yana hər anlamda qardaş köməyini görməkdəyik. Başda "Neftçi" olmaqla bütün qardaş Azərbaycan xalqına dərin təşəkkürümü bildirirəm. Hər birimizə səbr diləyirəm".

Hakan Sünal (“Sumqayıt” akademiyasının direktoru):

"Öncə bütün türk millətinin başı sağ olsun. Dünyada bənzəri olmayan zəlzələdə həyatını itirən insanlara Allahdan rəhmət diləyirəm. Acımız böyükdü. Fikrimiz orda yaşayanların yanındadı. Bir türk olaraq, uzaqda olsaq da, onlara yardım etmək arzumuz var və əlimizdən gələni etməyə çalışacağıq.

"Sumqayıt" klubu və akademiyamız bununla bağlı dünən ilk addımı atdı. U-14-dən U-19 komandamıza qədər təxminən 320 futbolçu, 40-a yaxın məşqçi və 600-dən çox valideyn geyim, qida tədarükü görməyə başlayıb. İnşallah, yaxın günlərdə bunu zəlzələdən əziyyət çəkən bölgələrə çatdıracağıq. Azərbaycan xalqına dərin təşəkkürümü bildirirəm. Qardaş Azərbaycan qısa zamanda Türkiyəyə yardım əlini uzatdı".

Sərtan Taşkın (“Zirə”nin futbolçusu):

"Çox böyük fəlakətdi. Bu zəlzələ həqiqətən çox qorxuludu. Allahdan ölənlərə rəhmət, yaralılara şəfa diləyirəm. Ümid edirəm ki, qısa zamanda dağıntılar altında qalanlar sağ-salamat xilas ediləcək. Dağıntılar altında qalanlar arasında mənim də yaxın dostum var idi. Çox şükür ki, xilas edilib və sağdı. Dünəndən Azərbaycanda da yardım kampaniyaları başlayıb. Türk xalqının indi bu yardımlara ehtiyacı var. Mən də öz növbəmdə əlimdən gələn qədər kömək edirəm".

ABDULLA İSMAYILOĞLU