Dünən Türkiyə çempionatının 20-ci turunda lider ''Qalatasaray'' öz meydanında ''Antalyaspor''u qəbul etdi.

İstanbul nəhəngi bu mövsümkü ən sevimli hesabı – 2:1 ilə qalib gələrək ən yaxın rəqibi ilə xal fərqini 7-yə yüksəltdi. Belə ki, ''Cim-Bom''un cari ''futbol ili''ndə əldə etdiyi 14 qələbədən 7-də məhz bu hesab qeydə alınıb. Bununla da ''sarı-qırmızılar''ın qələbə seriyası çempionatda 9, rəsmi matçlarda 12 oyuna yüksəldi. Baş məşqçi postuna ötən yay gələn Okan Buruk ilk mövsümdəcə inanılmaz bir göstəriciyə nail oldu. Buruk ''Qalatasaray'' tarixində 1959-dan bu yana ardıcıl 12 rəsmi oyunda qələbə sevinci yaşayan ilk mütəxəssis oldu! Növbəti tur komanda səfərdə ''Girəsunspor''u da yenəcəyi təqdirdə 49 yaşlı Buruk yenə bir ilkə imza atacaq. Belə ki, indiyə qədər klub tarixində ardıcıl 10 çempionat oyununda qalib gəlməyi bacaran məşqçi olmayıb. Mustafa Dənizli 1987/88 və Fatih Terim 2011/12-də 9 oyunluq qələbə seriyası yaxalayıb.