"Elvin artıq komandamıza qoşulub. Məşqlərdə də həvəslə çalışır, oynamağa can atır. Kollektiv də onu yaxşı qarşıladı. Futbolçular ona böyük qardaş kimi hörmət edir. Məşqçilər heyəti ilə ünsiyyəti, hörməti də yerindədi. Onun təcrübəsindən yararlanıb oyunlarda şans vermək istəyirəm. Komandada təcrübəli futbolçuların yer alması hərtərəfli yaxşıdı. Amma Elvinin "Kəpəz-2"də oynayıb-oynamayacağına rəhbərlik qərar verəcək. Razılıq olsa, biz ona şans verməkdə maraqlıyıq. Birinci dövrəni pis keçirmədik. Rauf kimi təcrübəli forvardın karyerasını bitirməsi, Əli Səmədovun "Şamaxı"ya keçidi işimizi çətinləşdirdi. Çalışacağıq onların yerini dolduraq. Rəhbərlik qarşımıza ilk "3-lüy"ə düşmək hədəfi qoymayıb. Məqsəd gənc futbolçuları yetişdirmək və onları əsas komandaya qazandırmaqdı. Buna rəğmən, adımıza, oyunumuza uyğun pillədə qərarlaşmaq istəyirik".

"Raufla Əfran yaxşı futbolçular idi. Düşünürəm ki, bir qədər də oynaya bilərdilər. Amma fərqli seçim etdilər. Bizə onların qərarına hörmətlə yanaşmaq qalır. Hər ikisinə bundan sonrakı həyatlarında və karyeralarında uğurlar arzulayıram. Rauf vurduğu qollar, gənc futbolçularla anlaşma, komandamıza dəstəyi ilə seçilirdi. Qısası, onun yeri görünəcək. Millimizin sabiq üzvü fədakarlıqla bizə kömək edirdi. Dizində xroniki zədə olmasına baxmayaraq, meydanda əlindən gələni edirdi. Bunda onun məşqçilər heyəti, gənc futbolçularla qaynayıb-qarışması, həmçinin hər birimizin ona hörmət və qayğı göstərməsinin də rolu az deyildi. Bunlar olanda istənilən futbolçu həm oyuna yaxşı köklənir, həm də meydanda komandası üçün döyüşür. Raufun yerini doldurmaq çətin olacaq. Ona özüm və bütün "Kəpəz-2" kollektivi adından təşəkkürümü bildirirəm" .