“İmişli” İmişliyə nə vaxt qayıdır?
Birinci divizionda çıxış edən “İmişli”nin mövsmün ilk yarısında ev oyunlarını Saatlı Olimpiya Kompleksində keçirib.
Buna səbəb İmişi şəhər stadionun çempionat oyunlarına hazır olmaması idi. Bölgənin eyni adlı təmsilçisinin baş məşqçisi Ruhid Usubov bir müddət öncə saytımıza verdiyi açıqlamasında qış fasiləsindən sonra doğma azarkeşləri qarşısında çıxış edəcəklərini bildirmiş, arenanın çempionat oyunlarına hazır vəziyyətə gətiriləcəyini söyləmişdi. Təxminən iki həftədən sonra aşağı dəstədə də fasilə başa çatır. Görəsən, İmişli stadionunun durumu necədi?
Bu suala cavab tapmaq üçün komandanın baş məşqçisi ilə əlaqə saxladıq. Ruhid bəy “Football-plus.az” saytına açıqlamasında bunları söylədi:
“Ümumilikdə stadionumuz çempionat görüşlərini qəbul etməyə hazırdı. Paltardəyişmə otaqlarında, istilik və su sistemində heç bir problem yoxdu. Bizi narahat edən yeganə məqam ot örtüyü ilə bağlıdı. Bir neçə ay öncə toxum səpilsə də, havaların soyuq keçməsi otun istənilən səviyyədə cücərməsinə mane olub. Bu gün üçün qazon 80 faiz hazırdı. Ancaq bütün suallara PFL-in təftişindən sonra aydınlıq gələcək. Fikrimcə, yazda ot örtüyü ideal səviyyədə olacaq”.
Ruhid bəy qış fasiləsində komandada olan dəyişikliklərə də toxundu:
“Mövsümün ilk yarısını “Araz Naxçıvan”da keçirən Nəbi Məmmədovun bizə qoşulduğunu demişdim. Ondan başqa “Sabah”ın U-19-da çıxış etmiş futbolçu ilə anlaşmışıq. İki qapıçı klubumuzu tərk edib. Rafiq Kərimov MOİK-ə keçib. Rafiq Hüseynova isə ilk dövrədə çox şans yaratsam da, özünü göstərə bilmədiyindən vidalaşdıq. Onların əvəzinə “Mingəçevir”dən Pərvin Zeynalovu “rənglərimizə bağlamışıq”.
Mövsümə o qədər də yaxşı start verməyən “İmişli” uzun müddət sonuncu pillədə qərarlaşsa da, fasilə ərəfəsində bir neçə uğurlu oyun keçirməklə xal ehtiyatını artırmağı bacarmışdı. Baş məşqçi qışdan sonra da uğurlu çıxışı davam etdirmək fikrində olduğunu söylədi:
“Fasilə ərəfəsində komanda uğurlu seriya yaxlamışdı. İnanın, fasilənin olmasını heç istəmirdim. Çalışacağıq fasilədən sonra da azarkeşlərimizi sevindirək. Hazırlıq dönəmində bir yoxlama görüşü artıq keçirmişik. Gəncədə “Kəpəz-2” ilə qarşılaşdıq və oyun 1:1 hesabı ilə başa çatdı. Yanvarın 24-ü və ya 25-i səfərdə “Mingəçevir” ilə üz-üzə gələcəyik”.
RƏŞAD
Digər xəbərlər
