Uzun fasilədən sonra birinci diviziona dönən “İmişli” iyunun son həftəsindən yeni mövsümün hazırlığına start verib.

Eyni adlı bölgəni təmsil edən klubun baş məşqçisi Ruhid Usubov "Football-plus.az" saytına açıqlmasında yoxlama matçları keçirmək üçün rəqib tapmaqda çətinlik çəkdiklərini bildirməklə yanaşı, qarşıdakı planlar barədə söhbət açdı: “İyunun sonlarından öz meydanımızda hazırlığa start vermişik. Yeri gəlmişkən onu da bildirim ki, çempionat görüşlərini keçirəcəyimiz stadionun ot örtüyü tədricən özünə gəlir. Bildiyiniz kimi, son illər baxımsızlıq səbəbindən qazon keyfiyyətini tam itirmişdi. Ancaq komandanın birinci divizionda çıxış edəcəyi dədiqləşəndən sonra gündəlik suvarma ilə problemi aradan qaldırmağa çalışırıq. Təxminən 20-25 gündən sonra ot örtüyü əvvəlki səviyyəsinə qayıdacaq. Komanda gündəlik məşqlərlə yanaşı, bu günə kimi 2 yoxlama matçı keçirib. Hər ikisində həvəskar kollektivlə qarşılaşmışıq. Avqustun 9-na daha bir oyun planlaşdırmışıq. Mingəçevirdə yerli komanda ilə qarşılaşacağıq. Ümumiyyətlə sınaq görüşləri keçirmək yönündə çətinlik çəkirik. Hansı komanda ilə əlaqə saxlayıram İmişliyə gəlmək istəmir. Bizim isə maddi durumumuz Bakıya və yaxud uzaq rayonlara səfər etməyə imkan vermir. Hələ klubun büdcəsi də təsdiqlənməyib”.

“İmişli”nin büdcəsi təsdiqlənməsə də baş məşqçi komandanın gücləndirmək yönündə bəzi addımlar atdıqlarını, heyətə yeni futbolçular dəvət etdiklərini bildirdi: “Ötən dəfə sizə dediyim ki, “İmişli”nin əsasını yerli futbolçular təşkil edəcək. Ancaq kənardan da 2-3 oyunçu dəvət etməyi planlaşdırırıq. Artıq onlardan ikisi ilə razılıq əldə olunub. Ötən mövsüm Region Liqasında “Xan Lənkəran”ın şərəfini qoruyan Əli Tağızadə və Mahsun Qəmbərli yeni mövsümdə bizdə çıxış edəcək”.

RƏŞAD