Divizion klubu “oyundankənar vəziyyət”də qalıb - AÇIQLAMA
2022/23 mövsümdən birinci divizionda çıxış edəcək “İmişli” bu gündən məşqlərə başlayacaq.
Bu haqda bilgini komandanın baş məşqçisi Ruhid Yusifovdan aldıq. 36 yaşlı çalışdırıcı “Football-plus.az” saytına açıqlamasında bunları söylədi:
“Bu gündən etibarən komanda İmişlidə hazırlığa start verəcək. Heyətin əsasını yerli gənclər təşkil edəcək. Bilirəm ki, belə kollektivlə divizionda iddialılar sırasında yer almaq çətin olacaq. Buna baxmayaraq, həvəsdən düşmürük. Büdcəmiz o qədər geniş deyil ki, kənardan futbolçu dəvət edək. Başqa klublarda çıxış edən, əslən İmişlidən olan bir neçə oyunçuya dəvət göndərmişdik. Lakin büdcəsi bizdən üstün olan bəzi aşağı dəstə təmsilçiləri onlara daha çox maaş təklif etdiklərindən biz “oyundankənar vəziyyətdə” qaldıq”.
Bölgə təmsilçisinin baş məşqçisi bizimlə söhbətdə Heydər Əliyev adına İmişli şəhər stadionunun son durumuna da toxundu:
“Paltardəyişmə otaqlarına əl gəzdirilib, lazımi yerlər təmir olunub. Qazona gəlincə, ot örtüyü, demək olar, hər gün sulanır. Böyük ehtimalla avqustun 24-nə, yəni çempionatın startına kimi meydan istədiyimiz vəziyyətdə olacaq”.
RƏŞAD
Digər xəbərlər
