Misli premyer-liqasının 18-ci turunda "Neftçi" "Şamaxı"nı 3:0 hesabı ilə məğlub edib.

Football-plus.az xəbər verir ki, oyundan sonra flaqmanın baş məşqçisi Laurentsiu Regekampf görüş haqda fikirlərini səsləndirib:

- Komanda uğurlu qrafik yaxalayıb və qış fasiləsi yaranır. Bunun xeyrinizə olmadığını düşünmək olar?
- Xeyr. Ümid edirəm ki, bu, bizə pis təsir etməz. Bu cür oyunlardan sonra 10 gün fasilə hamımıza yaxşı təsir edəcək. Qayıdanda daha güclü olmalıyıq. İnanıram ki, fasilədən yararlanacağıq. Zədəlilərimizin qayıdacağına ümid edirəm. Təlim-məşq toplanışından sonra daha güclü olacağımıza inanıram. Bəzi açar oyunçularımız bizimlə məşq edə bilmir. Keyfiyyətin artacağına ümid edirəm.

- İsmayıl Zülfüqarlı və Ağadadaş Salyanski meydanda ən yaxşılar idi...
- Onlar komandamızın üzvləridi. Qol vurdular, amma bu, komandanın zəhməti idi. Eminin ötürməsini də qeyd etməliyik. Çox sevinirəm ki, gənc oyunçular oyun səviyyəmizə uyğunlaşa bilirlər. Amma çox işləməlidirlər və bunu bilirlər.

- Qışda komandadan gedənlər çox olacaq?
- Deməzdim. Bizə güclənməli olduğumuz mövqelərə oyunçular gətirmək lazımdı. Peşəkarıq. 3-4-dən artıq futbolçu dəyişə bilmirsən. Hər yeni gələn futbolçunun davamlılığa ehtiyacı var. Çalışmalıyıq ki, keyfiyyətimkzə keyfiyyət qataq. Say xətrinə oyunçu gətirməyəcəyik. Komanda qurmaq üçün vaxt lazımdır. Futbolçular öyrəşməlidi. Sağlam atmosfer lazımdı ki, inkişaf etsinlər.

- Qış fasiləsinə 3-cü yerdə getmək sizi nə dərəcədə qane edir?
- 3-cü yerlə qane ola bilmərəm. Hamı istəyir ki, 1-ci olsun. Mənim də məqsədim budu. Çalışırıq ki, bunu düzgün edək. Hamı da bunu edəcək. Hər kəs ən yaxşısını verməyə çalışacaq ki, ilk pillələrə qalxaq. Çoxlu iş, stress var. Amma bu, bizim işimizdi.

- Hansı mövqelərə transferlər olacaq? Anlaşmağa yaxın olduğunuz kimsə varmı?
- Bu, mənim işim deyil. Bu mövzuda danışa bilmərəm. Komanda rəhbərliyi ilə bu danışırıq. Müşahidə Şurası ilə də maliyyə baxımından müzakirələr gedib. Təhlil edib, nələr edə biləcəyimizə baxacağıq. Bütün işimiz komandanın yaxşılığı üçün olacaq. Birdən 10 oyunçunu dəyişəcəyimizi gözləməyin. Bu, peşəkar və sağlam iş olmaz. Razılıq olandan sonra məlumat ola bilər. Adlar, mövqelər açıqlamaq düzgün olmaz.

- Oyun fəlsəfəsi olaraq komandaya aşılamaq istədiyinizin nə qədərini meydanda görmüsüz?
- Cavab vermək çox asandır. Necə qol vurduğumuzu analiz etməliyik. Bu gün ilk qolumuzu xatırlayın. İrəlidə pressinq edib, topu almağa çalışdıq. Oyunçunun kefiyyyəti də rol oynadı. Eminin mükəmməl ötürməsini qeyd etmək lazımdı. Futbol fəslsəfəm çox sadədi. Topu rəqibdən çox tez almağa çalışırıq. Amma bunu tam aşılamaq üçün komanda daha əzmkar çalışmalıdı. İstədiyimiz səviyyəyə çatacağıq. Mövsümdən əvvəl istədiyimiz kimi hazırlaşmaq üçün çox vaxt olmadı. Ona görə indidən yay üçün də komanda quracağıq. Çalışacağıq ki, böyük dəyişikliklər etməyək. Yayda təlim-məşq toplanışına hazır şəkildə getmək istəyirik. Onda da avrokubokda qrup mərhələsində oynamağa ümid edə bilərik. Bizim planımız budu. Düşünürəm ki, doğru yoldu. Bu kokmanda ölkənin iki ən böyük komandası arasında olmalıdı. Hazırda “Qarabağ”la bizim aramızda fərq böyükdü. Çox danışmamalıyıq. Daha çox işləməli və çalışmalıyəq ki, istədiyimizi quraq. Geridən gələcəyik.