Misli premyer-liqasında 4-cü turun növbəti görüşü keçirilib.

"Neftçi" "Zirə"ni qəbul edib. Meydan sahibləri görüşdən 2:1 hesablı qələbə ilə ayrılıb. Oyundan sonra "ağ-qaralar"ın baş məşqçisi Laurentsiu Regekampfın mətbuat konfransı keçirilib. Mütəxəssis fikirlərini bölüşüb və jurnalistlərin suallarını cavablandırıb:

- İki oyunda qapınıza 5 penalti təyin olunub. Bu, nədən irəli gəlir?
- Bugünkü penaltiyə baxanda deyə bilmərik ki, intizam yoxdu. Oyunçu artıq zərbəni vurmuşdu, futbolçumuz da sürüşmə fəndini yerinə yetirdi. Hakimin işinə qarışmaq istəmirəm. Onlar belə görübsə, deməli düzdü. İki oyunda qapımızda 5 penalti görmək mənim üçün də təəccüblüdü. Amma bu, futboldu. VAR sistemi də olduğundan indi hər şey daha asandı.

- Komandanızın istədiyiniz oyunu göstərməyi üçün nə qədər vaxt lazımdı?
- Biz vaxt haqda danışmalı deyilik. Yeni komanda qurmaq həmişə çətin olur. Hətta "Sabah"a məğlub olduğumuz oyuna baxsaq, qol vurmaq üçün çoxlu şanslarımız var idi. Son iki matçda epizodları qola çevirməkdə bəxtimiz gətirmədi. Əgər bunlar reallaşsaydı, indi başqa şeydən danışırdıq. Yeni oyunçular da Azərbaycan çempionatının gücünü dərk etməlidirlər. Onlar bizim yaratdığımız şanslara daha ciddi yanaşmalıdılar. Kənardan baxanda məndə bəzən elə hiss yaranır ki, biz odla oynamağı xoşlayırıq. Bəzən də odla çox oynayanda özün yanmağa başlayırsan. Hər gün problemləri aradan qaldırmağa çalışırıq. Düşünürəm ki, oyunçularımın kifayət qədər artırmağa imkanları var. Çox keyfiyyətli futbolçularımız var. Yaxşı sol cinah müdafiəçisi də tapmışıq. Geridən hücum qurmaqda bizə kömək edə bilər. Bəzi mövqelər var ki, daha da yaxşılaşdırmalıyıq. Komandamız daha da güclü olacaq.

- Səfər oyunlarında komanda sanki zəif çıxış edir. Bunun səbəbi nədi?
- Bu stadion bəlkə də mənə uğur gətirir. Arzu edirəm ki, növbəti səfər oyunumuzda qələbə qazanaq. Bunun üzərində işləyəcəyik.

- Mirbabdulla Abbasovun əvəzedici komandaya göndərilməsinin səbəbi nədi?
- Mən Allah deyiləm ki, kimin yaxşı, kimin pis olduğunu deyim. Sadəcə olaraq futbolçuların məşqdəki performanslarına fikir verirəm. Mirabdullada bizə lazım olacaq qədər performans görmədim. Onun kifayət qədər vaxtı var ki, özünü yaxşı göstərsin və biz əsas komandaya cəlb edək. Birlikdə kifayət qədər məşqimiz olub. Mənim daha güclü hücumçuya ehtiyacım var. Bu, o demək deyil ki, Mirabdulla pis oyunçudu.