Bu gün Konfrans Liqasının 3-cü təsnifat mərhələsində keçiriləcək “Neftçi” – “Rapid” (Vyana) oyunuöncəsi mətbuat konfransında “ağ-qaralar”ın baş məşqçisi Laurentisu Regekampf iştirak etdi.

Football-plus.az xəbər verir ki, xəbər verir ki, rumıniyalı mütəxəssis matç barədə fikirlərini səsləndirib, jurnalistlərin suallarını cavablandırdı:

- Oyundan gözləntiləriniz nədi?
- Çox çətin rəqibdi. Çox yaxşı çempionatda yarışırlar. Asan oyun olmayacaq. Amma çox yaxşı hazırlaşmışıq. İnanıram ki, sabah “Aris”lə oyundakı inam və mübarizəni göstərə biləcəyik.

- Komanda səfərdə “Aris”ə uduzandan sonra evdə qalib gəldi və azarkeşlərdə inam qığılcımı yaratdı. Bunun xüsusi motivasiya olacağını düşünürsüz?
- Bəli. Buna ümid edirəm. Hamımız çox motivasiyalıyıq. Bu səviyyəni qorumalıyıq. Eyni cür döyüşməliyik. Ümid edək ki, 90 dəqiqənin sonunda qələbə qazana biləcəyik.

- Mərt Çəlik komandaya qayıtdı. Onun barədə hansı məlumatınız var? Sabah meydana çıxa bilərmi?
- Onu çox izləyə bilməmişəm. Komandaya dünən qatılıb. Xoş gəlib. Bilirik ki yüksək səviyyəli oyunçudu. Komandada onunla eyni mövqedə olan futbolçularla rəqabət aparıb heyətdə yerini qazanmalıdı. Ona bir az da vaxt lazımdı ki, yeni oyunçulara adaptasiya olsun.

- Son oyunla müqayisədə heyətdə dəyişiklik olacaq?
- Bunu deyə bilmərəm.

- Azarkeşlər transferlərə görə narahatdı. Yeni oyunçu cəlb edilməsi nəzərdə tutulub?
- Sabah oyunumuz var. Mərt dünən gəlib. Bu mövqedə bir oyunçuya ehtiyacımız var idi. Komandamız bütövlüklə sabahkı oyuna konsentrasiya olub. Ehtiyacımız olarsa, güclü, səviyyəmizi artıracaq futbolçu gətirə bilərik.

- Mərt Çəliki hansı mövqe üçün düşünürsüz?
- Mərkəzdə, müdafiənin sağında, mərkəz yarımmüdafiəçisi kimi oynaya bilər. Gənc futbolçudu və çox inkişaf edə bilər.

- Adətən baş məşqçilər komandalarına həmyerlilərini gətirirlər. Amma sizin gəlişinizdən sonra “Neftçi”yə rumıniyalı oyunçu gəlməyib....
- Məsələ bu deyil. Büdcəyə uyğun hər hansı rumıniyalı oyunçu gətirə bilsək, bunu edəcəyik. Oyunçuları millətinə görə təhlil etmirik. Bu, ehtiyacımız və büdcəmiz əsasında olur. Hərtərəfli bizə uyğun oyunçu olsa, millətindən asılı olmayaraq, komandaya cəlb edə bilərik.