Misli premyer-liqasında 7-ci tura start verilib.

İlk oyun gününün son qarşılaşmasında "Səbail" "Neftçi"yə məğlub olub - 0:2. Matçdan sonra "ağ-qaralar"ın çalışdırıcısı Laurentsiu Regekampfın mətbuat konfransı keçirilib. Sizi mütəxəssisin fikirləri ilə tanış edirik:

- Demək olar ki, bu gün Patonu mərkəz hücumçusu kimi kəşf elədiz?
- Bilirik ki, Pato o mövqeyin oyunçusu deyil. Amma onu hər gün məşqlərdə izləyirəm. Bilirəm ki aqressiv oyunçudu. Təhlükəlidi, çünki, yaxşı sürətə malikdi. Bu gün son 15 dəqiqədə rəqib oyunu bizim üçün açdı. Ona görə də mən Patonu meydana buraxmaq qərarı verdim. Çünki, rəqibin buraxdığı boşluqlardan istifadə etmək istəyirdim.

- Boqomolski çox çalışdı, amma qol vura bilmədi. Bu, şanssızlıqla əlaqədardı?

- Düşünürəm ki, bu, normaldı. Oyun ərzində gördük ki, onun üçün epizodlar yarandı. Həm qaçdı, həm mübarizə apardı. Amma qol vurmaq məqamı çatanda düzgün qərar vermədi. Mənim ona böyük inamım var. Hazırda oyundan sonra milli komandanın düşərgəsinə gedir. Ordan qayıtdıqdan sonra onun üzərində işləməyə vaxtımız olacaq.

- Qapı xəttində rotasiyaya necə baxırsız?
- Əlimizdə iki yaxşı qapıçımız olduğuna görə sevinməliyik. Hər ikisi məşqlərdə çox ciddidilər. Nə zaman hansına ehtiyacım olsa, onu da istifadə edə bilirəm.

- Fəridi qəzəblənib əvəzlədiz?
- Xeyr, belə deməzdim. Fərid gənc oyunçudu. Oyuna çox motivasiyalı başlamışdı. Onu məşqlərdə görürəm, bir futbolçu kimi çox istəyirəm. Oyun zamanı bəzi situasiyalar var ki, onları öyrənməlidi. Onu göstərdiyi oyuna görə dəyişmədim. Sarı vərəqə aldığına görə Fəridi əvəzlədim. Gənc oyunçudu, nəyə görə əvəzlədiyimi ona başa saldım.

- Sanki Kenni Sayefin fikri hələ də "Rapid"lə Vyanadakı oyunda qalıb...
- Xeyr. Bizim üçün çox vacib oyunçudu. Bir neçə oyun əvvəl bəxtsizlik oldu, isinmə hərəkətləri zamanı burnu qırıldı. Bir həftə ərzində tam məşq edə bilməmişdi. Amma bəxtimiz gətirib ki, çempionatda fasilə yaranır və çatışmayan cəhətlərin üzərində işləyəcəyik.

- Dörd oyundu qələbə qazanırsız. Belə bir məqamda çempionatda fasilə yaranacaq. Yüksək temp tutan komanda üçün bu, müsbətdi, yoxsa mənfi?
- Ümid edirəm ki, bu fasilə bizim üçün xeyirli olacaq. Bəzi zədəli futbolçularımızı bərpa etmək üçün vaxtımız var. Donyo, Pato, Caber, hətta Eddinin bəzi problemləri var. Amma o, milli komandanın düşərgəsinə getməlidi. Kenninin də fasilədən sonra daha yaxşı olacağını düşünürəm. Ümid edirəm ki, bu fasilə bizim üçün xeyirli olacaq və "Qarabağ"la oyuna kimi bütün futbolçular əlimin altında olacaq.

- "Qarabağ"la oyuna görə sizdə həyəcan var? Çünki, azarkeşlərin gözü bu derbidə olacaq...
- Bizim üçün asan oyun olmayacaq. Onların Avropa Liqasındakı çıxışı mükəmməldi. Dünən "Nant"a qarşı çox yaxşı oyun nümayiş etdirdilər. Bilirəm ki, bu oyun böyük bir stressdi. Bütün futbolçular bu matçda çox motivasiyalı olacaqlar. Oyuna hazırlaşmağa kifayət qədər vaxtımız var. Hazırda nəticə o qədər də önəmli deyil. Çünki, öz aramızda çox oyunlarımız olacaq. Amma əlbəttə ki, məğlub olmamaq vacibdi.