Ölkə kubokunun 1/4 final mərhələsinin ilk oyunları arxada qaldı.

Football-plus.az xəbər verir ki, maraqlı matçlardan biri də "Səbail"lə "Sabah" arasında baş tutdi. Bu məhsuldar oyun "dənizçilər"in 3:2 hesablı qələbəsiylə yekunlaşdı. "Səbail"in heyətində ən yaxşılardan biri komandanın ilk qolunu vuran Kizito Luvaqa idi. Portuqaliyalı hücumçu ilə əlaqə saxlayıb həm son görüş, həm də başqa məsələlər ilə bağlı danışdıq.

- "Sabah"la matçda ən yaxşılardan idin. İki qol vursan da, biri ofsayd üzündən sayılmadı. Oyunla bağlı nə deyərdin?
- Güclü komandaya qarşı çətin oyun olacağını bilirdik. Hər matçda olduğu kimi, bu görüşə də qələbə üçün çıxmışdıq. Komandamın uğurlu olması üçün əlimdən gələnin artığını etmək istəyirəm. Məqsədim budu. Ümid edirəm ki, qollarımın davamı gələcək və komandamın qələbələrində pay sahibi olacam.

- 3:0-lıq qələbə hesabını qoruya bilməməyinizə nə səbəb oldu?
- Təbii ki, bizim üçün ən yaxşı nəticə 3:0 idi. Oyun belə bitsəydi, rəqibin mərhələ adlamaq şansı yetərincə azalacaqdı. Təəssüf ki, son dəqiqələrdə 2 qol buraxdıq. Bu görüşü unudub cavab qarşılaşmasında da yaxşı oyun göstərməliyik. Mərhələ adlamaq istəyirik.

- “Səbail”in heyətində qollar vurursan, bombardirlər yarışına qoşulmaq niyyətin yoxdu?
- İlk məqsədim komandamın uğurlu olmasıdı. Təbii ki, qələbələrimizdə pay sahibi olmaq istəyirəm. Daha çox qol vuraraq komandama qələbələr qazandırmağı düşünürəm.

- Kubokda yaxşı matç keçirsəz də, çempionat oyunlarında “qara zolaq”dan çıxa bilmirsiz. Bunun səbəbi nədi?
- Təbii ki, işlərin istədiyimiz kimi getmədiyinin fərqindəyəm. İlk əvvəl uyğunlaşma problemi yaşadıq. Yeni komandayıq. Bəhanə gətirmək istəmirəm. Amma 100 faiz əmin olduğum və gördüyüm şey komanda yoldaşlarımın bütün oyunlara qələbə qazanmaq üçün çıxması və sona qədər mübarizə aparmasıdı.

ABDULLA İSMAYILOĞLU