“Səbail”in futbolçusu Mirabdulla Abbasov klubun rəsmi saytına açıqlama verib.

Təcrübəli futbolçu Azərbaycan kuboku və premyer-liqanın növbəti turunun “Neftçi”yə qarşı oyunu ilə bağlı fikirlərini bildirib:

-İlk olaraq, Azərbaycan kubokunun 1/8 final mərhələsi ilə bağlı fikirlərini bilmək istərdik.
– Kubokun ilk oyunu hər zaman həyəcanlı olur. Çünki 1 qarşılaşmadan ibarərətdi. Rəqibin premyer-liqa və ya divizion təmsilçisi olmasının fərqi olmur. Şanslar bərabərdi. Buna görə də maksimum gücünü meydanda göstərməlisən. MOİK-lə oyun bizim üçün yaxşı keçdi. Komandamız layiqli qələbə qazanaraq mərhələ adladı.

– MOİK-lə görüşdə qələbənin pay sahiblərindən biri də sən idin. Komandamızın 3 qolu məhz sənin ayağından gəldi. Bu, həm də sənin “Səbail”ə qayıtdıqdan sonra vurduğun ilk qol oldu. Bu qol haqqında nə deyə bilərsən?
– Qol vurduğuma görə çox şadam. Lakin mənim üçün bundan da sevindirici məqam komandamızın qələbəsində pay sahibi olmağımdı. Ümid edirəm ki, bu qolun ardı gələcək və qollarımı sıralayıb komandama qələbələr qazandıracağam. Bunun üçün meydanda əlimdən gələnin ən yaxşısını edəcəyəm.

– Növbəti mərhələdə rəqibimiz “Sabah”dı. Masazır təmsilçisinə qarşı iki oyun keçirəcəyik. Rəqibi necə dəyərləndirirsən?
- 1/4 finalda bizi daha çətin rəqib gözləyir. “Sabah” bu mövsüm uğurlu çıxışı ilə seçilən komandadı. Amma bu bizi qətiyyən qorxutmur. Əksinə, belə bir rəqiblə qarşılaşmağımız bizim üçün daha yaxşıdı deyə düşünürəm. Bu tip komandalara qarşı daha fərqli ab-hava ilə oyuna çıxmalı olursan və daha çox məsuliyyət cəlb edir. Səhv etmək kimi şansın yoxdu. Hər birimiz bunun fərqindəyik.

– Qayıdaq premyer-liqaya. Fasilə başa çatdı və 15-ci turda “Neftçi” ilə qarşılaşacağıq. Komandadakı ab-hava necədi?
– MOİK üzərində qələbə komandamıza yaxşı təsir edib. Bu motivasiya ilə “Neftçi” ilə matça hazırlaşırıq. Ağır oyun olacaq. Bir o qədər də maraqlı olacağına şübhəm yoxdu. Hər iki komandada itkilər çoxdu. Ancaq hər iki komanda meydana qələbə üçün çıxacaq. Qələbə qazanmaq istəyirik. Buna ehtiyacımız var. Mən və komanda yoldaşlarım bunun üçün əlimizdən gələndən də artığını etməyə hazırıq.