Cüneyt Çakır Türkiyədə gündəmi zəbt etməkdə davam edir.

Məlum olduğu kimi son 10 ildə dünya futboluna damğa vuran ədalət təmsilçilərindən biri olan Çakır da daxil olmaqla ümumilikdə 13 hakim Türkiyə Futbol Federasiyası tərəfindən heç bir ciddi səbəb olmadan hakimlikdən kənarlaşdırılmışdı. Həmin hakimlərin şikayəti ilə Apellyasiya Komitəsi federasiyanın bu qərarını ləğv etsə də, məlum olmuşdu ki Hakimlər Komitəsinin bu hakimlərə yenə də oyun vermək fikri yoxdu. Bu isə Çakırın həm avrokubok matçlarına təyinat almaq, həm də DÇ-2022-yə yollanmaq perspektivinə ciddi zərbə vururdu.

Bir neçə gün öncə İsveçrə Futbol Federasiyasından Çakırla bağlı sürpriz tələb gəlmişdi. Onlar TFF-yə rəsmi müraciət edərək Çakırın İsveçrə çempionatının oyunlarını idarə etməsini istəmişdilər. İsveçrəlilər hətta bunun əvəzində TFF-yə özlərinin bir hakimini də təklif etmişdi. TFF bu məsələ ilə bağlı yekun qərarını verərək qarşı tərəfə cavab məktubu göndərib. TFF superliqa matçlarında əcnəbi hakimlərin olmadığını əsas gətirərək qarşı tərəfdən özünə heç bir hakim götürməyib. Amma qurum Çakırla bağlı isveçrəlilərə müsbət cavab verib. Cavab məktubunda ''istəyirsizsə, Çakırla əlaqə saxlaya bilərsiz'' sözlərinə yer verilib. Bu, həm ünlü hakimin özü, həm də Türkiyə hakimliyi üçün yaxşı xəbərdi. Beləliklə, Çakır qarşıdakı həftələrdən etibarən İsveçrə çempionatında işləməyə başlayacaq. Onu bu mövsüm avrokuboklarda və eləcə də DÇ-2022-də izləyəcəyimizə dair ümidlər də artıb.