Azərbaycan müasir ölkə kimi varlığını təsdiq etmək üçün illərdi çalışır.

Dövlət Qərb və Şərq arasında mədəni, iqtisadi körpü olmaq məqsədinə qulluq edir, bunun əsas səbəbi isə onun starateji coğrafi mövqeyidi. Azərbaycan qədim tarixə və ənənələrə malik qonaqpərvər ölkədi. Hazırda ölkəmizdə 10 milyondan çox insan yaşayır. Bu baxımdan Avropada 18-ci ən böyük dövlətik. Respublika vətəndaşlarının etnik mənsubiyyəti, din, sinif, vəzifə və ya cinsiyyətindən asılı olmadan öz sərhədləri hüdudlarında onları tam mülki və siyasi hüquqlar ilə təmin edir. Azərbaycan həm səyahət, həm də yaşayış üçün ən təhlükəsiz yerlərdən sayılır, hər ölkədə olduğu kimi hər kəs özünü çətinə salmaqdan qaçır. Bakı ziyarət etmək üçün təhlükəsiz yerdi. Şəhərin mərkəzi və ətraf ərazilər xüsusilə diqqətəlayiqdi. Əcnəbilər belə küçələrdə hətta gecə sərbəst hərəkət edə bilirlər. Hər yerdə polislərə rast gəlmək olar və bu da öz növbəsində şəhəri daha təhlükəsiz edir. Ölkəmiz dünyada “Odlar yurdu” kimi tanınır. Dövlətimizdə müxtəlif dinlərə qulluq edən xalqlar yaşayır. Onları seçimlərinə görə o qədər də qınamırlar, şantaj etmirlər. Azərbaycan mədəniyyəti İran, Türkiyə və Qafqaz mədəniyyətlərindən təsirlənib. Vaxtilə SSRİ-nin tərkibində olduğuna görə rus mədəni irsinin təsiri hələ də mövcuddu. Bu gün Azərbaycan Qərb və Şərq xüsusiyyətlərini daşıyan müasir və qlobal bir ölkədi.

Ölkə haqda bu qədər danışmağımın bir səbəbi var. Dəyişiklikləri sevən millətik. Məsələn, Azərbaycanda 9 iqlim qursağından 7-si hökm sürür. Bu səbəbdən də havalar tez-tez dəyişir. Bundan başqa, 1 əsr ərzində 2 dəfə müstəqillik əldə etmişik. Çar Rusiyasının əsarətindən qurtulub, azadlığımızı əldə edib, daha sonra SSRİ-dən asılı olmuşuq. Bunun müqabilində də 1 əsr ərzində 3 dəfə əlifba dəyişmişik: ərəb, latın, kiril. Bəlkə də dünya tarixində ilkdi.
İndi də tarixi günlərin astanasındayıq. Təbii ki, dediklərim futbola aiddi. “Keşlə” adını dəyişərək Şamaxıya köçür. Premyer-liqanın 20-ci turundan etibarən bu şəhəri təmsil edəcək. Klub 1997-ci ildə fəaliyyətə başlayıb. Həmin vaxt adı “Xəzər Universiteti” olub. 6 il sonra ilk dəyişiklik prosesi baş verib. 2004-dən klub “İnter” adı ilə yarışlarda çıxış etməyə başlayıb. 13 il ərzində paytaxt təmsilçisi yetərincə uğur əldə edib. 2017-də isə yenidən adı dəyişdirilək “Keşlə” olub. 8 gün sonra - martın 18-də “qırmızı-ağlar” tarixə qovuşacaq. Həmin andan klub “Şamaxı” adlanmağa başlayacaq. Saat 15.00-da ilk dəfə yeni şəhərdə, yeni adla azarkeşlərinin önünə çıxacaq. Bu klub 25 ildi fəaliyyət göstərir. Bu da bir qərinədən də azdı. Dünya tarixində ilk dəfə bir klub 25 il ərzində 4 dəfə ad dəyişir. Qəribədi, düzdü? Əlbəttə, bu ancaq Azərbaycanda baş verə bilərdi. Çünki dəyişməyi və dəyişilməyi sevirik.

İndi bəziləri üçün maraqlıdı ki, yazının girişi ilə “Keşlə”nin “Şamaxı” olmasının nə əlaqəsi var? Yazının əvvəlində bildirdim ki, Azərbaycan Qərblə Şərq arasında mədəni, iqtisadi körpü olmaq məqsədinə qulluq edir, bunun əsas səbəbi isə onun strateji-coğrafi mövqeyidi. İndiki “Keşlə”, gələcək zamandakı “Şamaxı” ölkəmizə bənzəyir. Bu klub AFFA-nın bölgələrdə futbolun inkişafına dəstək olduğunu göstərməsinə qulluq edir. “Keşlə”nin Müşahidə Şurasının sədri Futzal Federasiyasının prezidenti Zaur Axundovdu. Yəni dolayısı ilə yox, elə birbaşa klub federasiya tərəfindən maliyyələşir. AFFA özünün tikdirdiyi stadion boş qalmasın, “ASK Arena”ya icarə haqqı ödənilməsin deyə belə addım atdı. Adı da qoyuldu ki, bölgələrdə futbolun inkişafını istəyirik. Əslində köç prosesi yaxşı addımdı. İllərdi hamı fərqli adlar çəkərək Bakı təmsilçilərinin rayonlara göndərilməsini istəyirdi. Yəni proses yaxşıdı, amma fikir və məramın nə olduğunu bir Allah, bir də AFFA rəsmiləri bilir. Əlbəttə, federasiyada bunu düşünənlərə əvvəlcə təşəkkür, dünya tarixində ilkə imza atdıqlarına görə isə təbrik edirəm.