“Klublar çalışmalıdı ki, hər birinin heyətində, heç olmasa, üç azərbaycanlı meydana çıxsın” - Rəşad Məcid
Ölkə kubokunun finalında “Sabah” “Zirə”yə qalib gələrək ardıcıl ikinci dəfə bu titulu qazandı. Start heyətləri açıqlananda məlum oldu ki, iki komandanın heyətində bir yerli futbolçu var. Söhbət “Zirə”nin oyunçusu Qismət Alıyevdən gedir.
Oyun gedərkən Mətbuat Şurasının sədri Rəşid Məcid “feysbuk”da paylaşdığı statusla diqqəti çəkdi:
“Başa düşdüm ki, meydanda cəmi bir azərbaycanlı futbolçu var, yoxsa səhv edirəm?”
Rəşad bəy “milləşdirilən” Aleksey İsayevi azərbaycanlı kimi hesaba almayıb. Hər halda, məqsəd yerli futbolçunun az olduğunu çatdırmaqdı. Onunla əlaqə saxladıq, legioner limitinin ləğvinə qarşı olub-olmadığını soruşduq:
“Bizim idman jurnalistləri arasında savadlılar, obyektiv olanlar var. Onlar prosesi təhlil edirlər. Mən həvəskar futbol izləyicisiyəm. Hansısa məqamları, qərarları yaxından izləmirəm. Mənim üçün sevindirici haldı ki, “Qarabağ”dan sonra “Sabah”, “Zirə”, “Turan Tovuz” kimi komandalar formalaşıb, güclü rəqabət yaranıb. Finalda üz-üzə gələn “Sabah”la “Zirə”nin oyununda baxanda təəssüf hissi keçirdim ki, ölkə kuboku uğrunda oyunda cəmi bir neçə yerli futbolçu oldu. Bu adamın özünəinam hissini də itirir. Niyə öz futbolçumuzu yetişdirə bilmirik? Bu suallar ətrafında fikirləşməyə məcbur olursan. Uşaq futbolu inkişaf etməlidi. Legioner limiti ləğv olunsa da, klublar çalışmalıdı ki, hər komandanın heyətində, heç olmasa, üç azərbaycanlı futbolçu meydana çıxsın”.
Xatırladaq ki, finalda hər üç qolun müəllifi əcnəbilər oldu - Ərən Aydın, Patrik Mbina və Coy-Lens Mikels.
MÜZƏFFƏR QULUZADƏ
Digər xəbərlər
