“Şəki” dünən səfərdə “Ağstafa Gəncləri”nə 1:3 hesabıyla uduzub. “Halvaçılar” Ağstafa şəhər stadionunda keçirilən oyunda əvvəldən axıra qədər 9 nəfərlə oynayıb. “Şəki” oyundan sonra sosial şəbəkə hesablarında maraqlı paylaşım edib:

“Şəki” PFK rəhbərliyi olaraq, ictimaiyyətə bildirmək istəyirik ki, komandamızın bir neçə futbolçusu ikinci liqanın sonuncu turunda keçirməli oyunda iştirakdan imtina etmişdir.

Qeyd edək ki, adı çəkilən futbolçular ikinci dövrə ərzində keçirdikləri oyunların və may ayına qədər olan bütün ayların əməkhaqqını almışdırlar. Hazırda isə may ayı çərçivəsində cəmi iki oyun keçirilmişdir və hər hansı rəsmi əməkhaqqı gecikməsi mövcud olmamışdır.

Buna baxmayaraq, futbolçular tərəfindən “son oyundu, ödəniş edilməyə bilər, əvvəlcədən ödəniş edilsin” kimi əsassız iddialar irəli sürülərək komandanın son oyununa çıxmaqdan imtina edilmişdir.

Oyunda iştirak etməyən futbolçular:
• Rəsul İbrahimov
• Zaur Fərzəliyev
• Çərkəz Hüseynov
• Mehdi Həşumov
• Nazim Bağırov

Klub daxilində aparılmış araşdırma zamanı müəyyən edilmişdir ki, komandanın kapitanı Rəsul İbrahimov futbolçularla əlaqə saxlayaraq onların da oyunda iştirak etməməsi üçün çağırışlar etmiş, bir neçə oyunçunun oyuna gəlməsinə əngəl olmuşdur. Bu səbəbdən komanda bu gün “Ağstafa Gəncləri” ilə oyuna 9 nəfər oyunçu ilə çıxmışdır.

“Şəki” rəhbərliyi başverənləri peşəkar futbol prinsiplərinə və klub daxili intizam qaydalarına zidd davranış kimi qiymətləndirir və buna uyğun hüquqi addımlar atılacağı baradə öncədən oyunçulara xəbardarlıq edilib”.