Ötən günlərdə “Sabah”ın mətbuat katibi Elnur Həmidovdan əldə etdiyimiz məlumata görə, azərbaycanlı azarkeşləri üçün 600-ə yaxın bilet ayrılmışdı. Bəs indi vəziyyət necədi? Komanda Rumınıyaya çatandan sonra azarkeşlərlə əlaqə yaradılıbmı?
“Football-plus.az” bu suala cavab tapmaq üçün yenidən Elnur Həmidovla əlaqə saxlayıb. Klub rəsmisi azarkeşlərlə ünsiyyətdə olduğunu, hazırda mürəciətlər gəldiyini, konkret sayın sabah bəlli olacağını söylədi.
Bu məsələ ilə bağlı daha ətraflı məlumat almaq üçün Rumıniyada yaşayan həmkarımız Abbas Zahidi ilə də əlaqə saxladıq:
“Biz – burda yaşayan azərbaycanlılar hamımız bir-birimizlə o qədər sıx əlaqədə deyilik ki, dəqiq say deyə bilim. Hazırda təxminən 50-55 azərbaycanlıyıq. Onlardan 10 nəfərə yaxın şəxsin gələcəyini bilirəm, amma bizdən əlavə kimlərin gələcəyindən xəbərim yoxdu. Kimin dostu gələcək, kim gəlməyəcək – bunu deyə bilmərəm. Mənim dörd dostum oyuna gələcək. Onlar rumındı, azərbaycanlı azarkeşlərin olduğu sektorda əyləşəcəklər. Digər azərbaycanlıların da türk, rumın və başqa millətlərdən olan dostları gəlib oyuna baxa bilər. “Sabah”la əlaqə saxlamışam. Biletin qiymətinə gəlincə, 20 avrodu. Rumıniya üçün bunun çox baha olduğunu demək çətindi, amma ucuz da deyil. 20 avro təxminən 105 ley edir. Halbuki burda yerli komandaların avrokubok matçları zamanı biletlərin qiyməti, adətən, 50-70 ley aralığında dəyişir. Təbii ki, bu qiymət qarşılaşan komandaların statusundan da asılıdı”.
İSRAYIL XEYRULLAYEV
