İngiltərə yığmasının qapıçısı Cordan Pikfordun “qeyri-real” adlandırdığı Meksika ilə 1/8 final qarşılaşması DÇ-2026-nın ən yaxşı oyunu seçilib.

"Football-plus.az" xəbər verir ki, “Sports Illustrated” turnirdə indiyədək keçirilmiş 100 matçın reytinqini hazırlayıb. Sıralama müəyyənləşdirilərkən yalnız vurulan qolların sayı yox, oyunların tempi, axıcılığı, dramatizmi, turnir baxımından əhəmiyyəti və azarkeşlərə yaşatdığı emosiyalar da nəzərə alınıb.

Reytinqin ilk pilləsində İngiltərə millisinin Meksikanı 3:2 hesabı ilə məğlub etdiyi oyun yer alıb. Mexikoda ildırım təhlükəsi səbəbindən bir saat gec başlayan qarşılaşmada beş qol, iki penalti və bir qırmızı vərəqə qeydə alınıb. İngiltərə DÇ tarixinə Meksikanı bu ölkənin paytaxtında məğlub edən ilk milli komanda kimi düşüb.

İkinci yerə Argentinanın Kabo Verde üzərindəki 3:2 hesablı qələbəsi layiq görülüb. Kabo Verde oyunda iki dəfə hesabı bərabərləşdirib və son dünya çempionuna ciddi müqavimət göstərib.

Argentinanın Misiri 3:2 hesabıyla məğlub etdiyi oyun isə 3-cü olub. Lionel Messinin komandası 78-ci dəqiqəyədək 0:2 geridə olsa da, 13 dəqiqə ərzində üç qol vuraraq böyük geridönüşə imza atıb. Messi penaltidən yararlana bilməsə də, daha sonra qol və məhsuldar ötürmə ilə seçilib.
4-cü pillədə qol vurulmayan Kolumbiya - Portuqaliya görüşü qərarlaşıb. Nəşr 0:0 hesabına baxmayaraq, qarşılaşmanın yüksək tempdə və qarşılıqlı hücumlar şəraitində keçdiyini vurğulayıb.

Portuqaliyanın Xorvatiyanı 2:1 hesabıyla məğlub etdiyi dramatik oyun 5-ci olub. Xorvatiyanın əlavə vaxtın 13-cü dəqiqəsində vurduğu qol VAR yoxlamasından sonra ofsayd səbəbindən ləğv edilib.

Niderland - Mərakeş oyunu (1:1, p. – 2:3) 6-cı, Əlcəzair və Avstriya yığmalarının 3:3 hesablı heç-heçəsi 7-ci, yeddinci, Braziliyanın Yaponiyanı 2:1 məğlub etdiyi oyun 8-ci, Niderland - Yaponiya oyunu (2:2) isə 9-cu olub.

İlk “10-luğ”u Belçikanın Seneqal üzərindəki 3:2 hesablı qələbəsi tamamlayıb. Belçika iki top fərqi ilə geri düşdüyü qarşılaşmada hesabı bərabərləşdirib, əlavə vaxtda isə Yuri Tilemansın penalti qolu ilə qələbə qazanıb.

Sıralamada ən zəif qarşılaşma Uruqvay və İspaniya milliləri arasında keçirilən oyun sayılıb. İspaniyanın 1:0 hesabı ilə qalib gəldiyi görüş reytinqdə 100-cü yeri tutub. Paraqvay - Avstraliya matçı 99-cu, Çexiya - Cənubi Afrika matçı 98-ci pillədə qərarlaşıb.