Afrika zonasında gələnilki dünya çempionatının seçmə turnirinin qrup mərhələsi başa çatıb.

"Football-plus.az" xəbər verir ki, D qrupunda da son oyunlar keçirilib. Məhz bu oyunlar final turnirinin daha bir yeni iştirakçısını üzə çıxarıb. Bəli, Leandro və Patrik Andradelərin şərəfini qoruduğu (bu məqamla bağlı sonda) Kabo-Verde yığması tarixində ilk dəfə dünya çempionatında oynayacaq.

Kabo-Verde yığması son turda evdə Esvatini üzərindəki 3:0 hesablı qələbə ilə 6 komandanın olduğu qrupda liderliyi təmin edib. Üç qolun hamısı ikinci hissədə vurulub – Daylon Livramento, Villi Semedo və Stopira fərqlənib.

“Mavi akulalar” D qrupunda liderlik uğrunda Kamerunla mübarizə aparırdı. Kamerun Anqolanı məğlub etməklə yanaşı, Kabo-Verdenin büdrəməsinə bel bağlamalıydı. Ancaq belə olmadı. “Qarşısıalınmaz şirlər” heç-heçə ilə kifayətləndilər və indi yalnız pley-off oyunları vasitəsi ilə DÇ-yə vəsiqə qazana bilərlər.

Kabo-Verde Atlantik okeanındakı 10 adadan ibarət arxipelaqdı, 600 minə yaxın əhalisi var. Ölkənin ərazisi 4 min kvadrat kilometrə yaxındı. Kabo-Verde nə vaxtsa dünya çempionatının final mərhələsinə vəsiqə qazanan ölkələr arasında ərazisinə görə ən kiçiyidi. Əhali sayına gəlincə, DÇ iştirakçısı olanlar arasında yalnız İslandiyadan irəlidədilər.

Hakimin final fiti səslənən kimi minlərlə azarkeş tribunalardan meydana axışıb. Onları anlamaq olar, faktiki arzuları çin olub, nağıllar gerçəkləşib.
Beləliklə, 48 yığmanın çıxış edəcəyi dünya çempionatında artıq üç debütantın olacağı dəqiqdi. Bunlar İordaniya, Kabo-Verde və Özbəkistandı. Hələ ki 48 iştirakçıdan 28-i məlumdu. Onu da xatırladaq ki, mundial gələn il iyunun 11-dən iyulun 19-na qədər üç ölkədə - ABŞ, Kanada və Meksikada keçiriləcək.

Kabo-Verde yığması 2000-ci illərin ortalarına qədər Afrikada ən zəiflərdən sayılırdı. Ancaq 2010-cu ildən sonra tərəqqi hiss olunmağa başladı. Komanda 2013-cü və 2023-cü illərdə Afrika Millətlər Kubokunda 1/4 finala qədər irəlilədi. Kabo-Verde hazırda FİFA reytinqinin 70-ci pilləsində qərarlaşıb.

Yığmanın heyətində Avropa liqalarında – Portuqaliya, Türkiyə, Bolqarıstan, Niderland, Macarıstan, İtaliya, Cənubi Kipr, hətta Azərbaycan çempionatlarında çıxış edən futbolçular var. Yığmaya ilk dəfə 2022-ci ilin martında dəvət olunan “Qarabağ”ın ulduzu Leandro Andrade indiyə qədər 7 oyun keçirib. Düzdü, Leandro ötən ildən bəri milli formanı geyməkdən boyun qaçırıb. “Araz-Naxçıvan”ın yarımmüdafiəçisi Patrik Andrade isə daha əvvəldən – 2020-ci ildən milli komandanın şərəfini qoruyur. Bu müddətdə 20 dəfə meydana çıxan Patrik son oyunlar üçün yığmaya dəvət alsa da, Esvatini ilə qarşılaşmada iştirak ərizəsinə adı salınmayıb. Baş məşqçi Bubiştanın onu DÇ-yə yollanacaq heyətə salıb-salmayacağı bilinmir.

“Tranfermarkt” portalı Kabo-Verde yığmasına 27,20 milyon avro qiymət qoyub. Ən baha üç oyunçu isə Kevin Lenini (“Krasnodar”, 5 milyon), “Trabzonspor”dan Vaqner Pina (5 milyon) və “Vitoriya Gimaraynş”dan Telmo Arkanjodu (3 milyon).